దక్షిణాది నటులు బాలీవుడ్లోకి వెళ్లడం కొత్తేమీ కాదు. అయితే తమ కెరీర్ ప్రారంభం నుంచి ఎక్కువగా తెలుగులోనే సినిమాలు చేసిన పలువురు ప్రముఖ నటులు.. ఈ ఏడాది లేదంటే వచ్చే సంవత్సరం హిందీ చిత్రసీమలో తమ స్టామినా చూపించబోతున్నారు. వారిలో జూ.ఎన్టీఆర్ మొదలుకుని సమంత, అడివి శేష్, నిఖిల్, విజయ్ దేవరకొండ ఉన్నారు. వీరందరూ ఏఏ ప్రాజెక్టులతో అక్కడి ప్రేక్షకులను అలరించబోతున్నారు? అవి ఎప్పుడు వచ్చే అవకాశముంది? వంటి విశేషాల సమాహారమే ఈ కథనం.
జూ.ఎన్టీఆర్-ఆర్ఆర్ఆర్
ఇప్పటివరకు కేవలం తెలుగులోనే నటించిన జూ.ఎన్టీఆర్.. 'ఆర్ఆర్ఆర్'తో బాలీవుడ్లోకి గ్రాండ్ ఎంట్రీ ఇవ్వనున్నారు. దర్శకధీరుడు రాజమౌళి తీస్తున్న ఈ పాన్ ఇండియా సినిమాలో రామ్చరణ్ మరో కథానాయకుడు. ఇప్పటికే 70 శాతానికి పైగా చిత్రీకరణ జరుపుకుంది. వచ్చే జనవరి 8న భారతదేశంలో దాదాపు 10 భాషల్లో విడుదల కానుంది.
సమంత- ద ఫ్యామిలీ మ్యాన్(సీజన్ 2)
ముద్దుగుమ్మ సమంత.. 'ద ఫ్యామిలీ మ్యాన్' సీజన్2 వెబ్ సిరీస్తో హిందీ పరిశ్రమలోకి అడుగుపెట్టనుంది. గతంలో వచ్చిన 'ఏక్ దివానా థా' అనే బాలీవుడ్ చిత్రంలో అతిథి పాత్ర పోషించిన ఈమె.. ఇప్పుడు పూర్తిస్థాయి పాత్రలో కనువిందు చేయనుంది. అయితే ఇందులో ఆమె ఉగ్రవాదిగా కనిపించనుందని సమాచారం. ఇది ఎంతవరకూ నిజమో తెలియాలంటే కొన్నిరోజులు ఆగాలి.
విజయ్ దేవరకొండ- ఫైటర్
సెన్సేషనల్ హీరో విజయ్ దేవరకొండ.. ఇప్పటివరకు దక్షిణాది భాషల్లో మాత్రమే నటించాడు. ప్రస్తుతం దర్శకుడు పూరీ జగన్నాథ్ తీస్తున్న యాక్షన్ సినిమాతో బాలీవుడ్లో కాలుమోపనున్నాడు. ఇందులో విజయ్.. బాక్సర్/ఫైటర్గా కనిపించనున్నాడు. ఈ ఏడాది చివర్లో లేదంటే వచ్చే ఏడాది ప్రారంభంలో ప్రేక్షకుల ముందుకు రానుందీ చిత్రం.
అడివి శేష్- మేజర్
తనకంటూ ప్రత్యేక ఇమేజ్ ఏర్పరచుకున్న అడివి శేష్.. ఇప్పటివరకు టాలీవుడ్ ప్రేక్షకుల్ని మాత్రమే అలరించాడు. 26/11 దాడుల్లో వీరమరణం పొందిన మేజర్ సందీప్ ఉన్నికృష్ణన్ బయోపిక్ 'మేజర్'లో ప్రస్తుతం నటిస్తున్నాడు. ఈ సంవత్సరం చివర్లో తెలుగు, హిందీ భాషల్లో విడుదల కానుంది. ఈ చిత్రాన్ని నిర్మిస్తోంది సూపర్స్టార్ మహేశ్బాబు కావడం విశేషం.
నిఖిల్- కార్తికేయ 2
టాలీవుడ్లో పలు పాన్ ఇండియా చిత్రాలు తెరకెక్కుతున్న వేళ.. అలాంటి ఓ కథలో నటించేందుకు సిద్ధమయ్యాడు హీరో నిఖిల్. అదే 'కార్తికేయ 2'. తొలిభాగం విశేషంగా ఆకట్టుకున్న నేపథ్యంలో రెండో భాగాన్ని గ్రాండ్గా తీయాలని భావిస్తున్నారు. ఇందులో భాగంగానే తెలుగుతోపాటు హిందీలోనూ తెరకెక్కిస్తున్నారు. తద్వారా బాలీవుడ్లోకి అరంగేట్రం చేయనున్నాడు నిఖిల్.
