"సర్కారు వారి పాట' చిత్రం చూసి మీరు నిజంగా చాలా ఆనందిస్తారు" అంటున్నారు నటి, మహేశ్బాబు సతీమణి నమ్రత. తాజాగా ఇన్‌స్టాగ్రామ్‌ వేదికగా అభిమానులతో ముచ్చటించిన ఆమె.. మహేశ్ గురించి, వ్యక్తిగత జీవితానికి సంబంధించి పలు ఆసక్తికర విషయాలు పంచుకున్నారు. మంచిగా తినడం, క్రమం తప్పకుండా వ్యాయామం చేయడం, టైంకి నిద్ర పోవడం.. ఇవే తన ఫిట్‌నెస్‌ రహస్యమని చెప్పారామె.
కూలెస్ట్ మామయ్య
తెలుగు చిత్ర సీమలో బాగా ఇష్టపడే నటుడెవరంటే.. మరో మాట లేకుండా మహేశ్ పేరే చెప్తానన్నారు. ఇక తన అభిమాన నటి మెరిల్‌ స్ట్రీప్‌ అన్నారు. కృష్ణగారు చాలా కూలెస్ట్ మామయ్య అని, నాకు తండ్రి కన్నా ఎక్కువని తెలియజేశారామె. "మహేశ్ స్క్రిప్ట్‌ సెలక్షన్స్‌లో మీ పాత్ర ఎంత ఉంటుంది?" అని ప్రశ్నించగా.. ఆయన పనుల్లో నేనెప్పుడూ కలుగజేసుకోనని తెలిపారు. మహేశ్ చిత్రాల్లో 'ఒక్కడు', 'పోకిరి', 'దూకుడు', 'భరత్‌ అనే నేను', 'సరిలేరు నీకెవ్వరు' చిత్రాలంటే చాలా ఇష్టమని, ముఖ్యంగా 'ఒక్కడు' చిత్రాన్ని లెక్కలేనన్ని సార్లు చూసినట్లు చెప్పారు.
మహేశ్ను చూసి ప్రేమలో పడ్డారు
మహేశ్ ఇంట్లో ఉంటే పిల్లలతో కలిసి టెన్నిస్‌, గోల్ఫ్‌, సెవెన్‌ పిన్స్‌ గేమ్స్‌ ఎక్కువ ఆడుతుంటారన్నారు. "మహేశ్ను ప్రేమిస్తున్నారని మీకెప్పుడు తెలిసింద"ని ప్రశ్నించగా.. "52రోజుల సుదీర్ఘ న్యూజిలాండ్‌ షెడ్యూల్‌లో ఆఖరిరోజు నాకు ఆ విషయం అర్థమైంద"ని చెప్పారు. మరి "మహేశ్ను చేసుకోవడానికి మీ తల్లిదండ్రులు వెంటనే ఒప్పుకొన్నారా?" అని అడగ్గా.. "మహేశ్ను చూసిన వెంటనే వారు ఆయన ప్రేమలో పడిపోయార"ని బదులిచ్చారు.
