కరోనా కేసులు గణనీయంగా పెరుగుతున్న వేళ లండన్లో లాక్డౌన్ ఆంక్షలు పెంచనున్నట్లు యూకే ప్రభుత్వం వెల్లడించింది. మూడు దశల లాక్డౌన్ను అనుసరిస్తున్న యూకే.. లండన్లో బుధవారం నుంచి మూడో టైర్ను అమలు చేయనుంది. ఇది దాదాపు పూర్తి స్థాయి లాక్డౌన్తో సమానమని అధికారులు తెలిపారు.
ఇటీవల కాలంలో భారీగా కేసులు పెరిగాయని, చాలా ప్రాంతాల్లో ఏడు రోజుల్లోనే కేసులు రెట్టింపు అవుతున్నాయని వైద్య శాఖ మంత్రి మాట్ హాన్కాక్ పేర్కొన్నారు. దీనికి అడ్డుకట్ట వేసేందుకు వేగవంతమైన, నిర్ణయాత్మక చర్యలు తీసుకోవాల్సిన ఆవశ్యకత ఏర్పడిందన్నారు. ఈ నేపథ్యంలో ఆంక్షలతో పాటు.. మొబైల్ టెస్టింగ్, కమ్యునిటీ టెస్టింగ్లను మరింత పెంచినట్లు తెలిపారు.
మరోవైపు, దేశంలో వెయ్యికిపైగా కరోనా కొత్త రకం కేసులను గుర్తించినట్లు మంత్రి తెలిపారు. దక్షిణ ఇంగ్లాండ్లో ఇవి ఎక్కువగా బయటపడ్డట్లు వివరించారు. 60 వేర్వేరు ప్రాంతాల్లో ఇవి వెలుగులోకి రాగా.. వీటి సంఖ్య మరింతగా పెరుగుతోందని చెప్పారు. గత కొద్ది నెలల్లో ఇలాంటి వైరస్ వివిధ దేశాల్లో కనిపించాయని తెలిపారు. డబ్ల్యూహెచ్ఓకు దీనిపై సమాచారం అందించినట్లు స్పష్టం చేశారు. ఇది ఇతర కరోనావైరస్ రకాలతో పోలిస్తే తీవ్రంగా ఉండే అవకాశం లేదని అన్నారు.
టీకా పంపిణీ
బ్రిటన్లో ఫైజర్ టీకా పంపిణీ కొనసాగుతోంది. వైద్యులు, జనరల్ ప్రాక్టీషనర్లు, నర్సులకు సోమవారం తొలి డోసు అందుకున్నారు. వైద్యుల కార్యాలయాల్లో టీకా పంపిణీ మొదలైందని అధికారులు తెలిపారు. వీరితో పాటు అధిక వైరస్ ముప్పు ఉన్నవారికి, ఫ్రంట్లైన్ వర్కర్లకు వ్యాక్సినేషన్ కొనసాగుతోందని చెప్పారు.
దేశవ్యాప్తంగా కరోనా టీకా పంపిణీ కొనసాగేలా వైద్య సేవల సిబ్బంది కృషి చేస్తున్నారు. స్థానికంగా వ్యాక్సినేషన్ కేంద్రాలను నెలకొల్పుతున్నారు.
