ఇరాన్కు అమెరికా అధ్యక్షుడు డొనాల్డ్ ట్రంప్ తీవ్ర హెచ్చరికలు చేశారు. అమెరికాకు వ్యతిరేకంగా ఏవైనా దుశ్చర్యలకు పాల్పడితే అంతకు వెయ్యి రెట్ల పరిమాణంలో ప్రతిదాడి చేస్తామని స్పష్టం చేశారు.
ఇరాన్ కీలక నేత కాశీం సులేమానీ మరణానికి ప్రతీకారం తీర్చుకునేందుకు ఆ దేశం ప్రయత్నిస్తోందన్న నివేదికల నేపథ్యంలో ఈ విధంగా స్పందించారు ట్రంప్.
"చాలా ఏళ్లుగా అమెరికా సైనికులు హత్యలకు గురవుతున్నారు. భవిష్యత్తులో సులేమానీ హత్యకు ప్రతీకారంగా ఇరాన్ హత్య లేదా ఇతర దాడికి ప్రణాళిక వేయవచ్చు. ఇదే జరిగితే అంతకు వెయ్యి రెట్లు అమెరికా ప్రతిదాడి చేస్తుంది."
- డొనాల్డ్ ట్రంప్, అమెరికా అధ్యక్షుడు
రాయబారి హత్యకు ప్రణాళిక!
దక్షిణాఫ్రికాలోని అమెరికా రాయబారి లానా మార్క్స్‌ను హత్యకు ఇరాన్ ప్రభుత్వం ప్రయత్నిస్తోందని ఓ వార్తా పత్రిక కథనం వెలువరించింది. ఇదే జరిగితే.. ఇప్పటికే రెండు దేశాల మధ్య ఉన్న ఉద్రిక్తతలు మరింత తీవ్రమవుతాయని పేర్కొంది. అమెరికా అధ్యక్ష ఎన్నికల నేపథ్యంలో ప్రతిదాడికి పాల్పడేలా ట్రంప్పై ఒత్తిడి పెరుగుతుందని వివరించింది.
అయితే, ఈ ఆరోపణలను ఇరాన్ ప్రభుత్వం ఖండించింది. ఎన్నికల ప్రచారంలో ఇరాన్ వ్యతిరేక భావజాలాన్ని అమెరికన్లు వినియోగిస్తున్నారని ఇరాన్ విదేశాంగ అధికార ప్రతినిధి సయీద్ ఖతిబ్జాడే పేర్కొన్నారు.
సులేమానీ మరణం..
ఇరాక్‌ రాజధానిలోని బాగ్దాద్‌లో అమెరికా దళాలు జనవరి 3న చేసిన దాడిలో ఇరాన్ రివల్యూషనరీ గార్డ్స్‌ కమాండర్ జనరల్‌ ఖాసిం సులేమానీ హతమయ్యారు. ఆయనతో సహా ఇరాక్‌లో ఇరాన్ మద్దతున్న తిరుగుబాటు సంస్థ పాపులర్ మొబిలైజేషన్‌ ఫోర్సెస్‌ (పీఎంఎఫ్‌) డిప్యూటీ కమాండర్ అబు మహదీ అల్‌-ముహందిస్‌ మృతి చెందారు.
ఈ దాడికి ప్రతీకారం తీర్చుకుంటామని ఇరాన్ ఇప్పటికే ప్రకటించగా.. పశ్చిమాసియాలో భారీ బలగాలను మోహరించింది అమెరికా. అప్పటినుంచి ఇరు దేశాల మధ్య యుద్ధమేఘాలు కమ్ముకున్నాయి.
ఇదీ చూడండి: ట్రంప్ మళ్లీ ఎన్నికైతే అమెరికా-ఇరాన్ మధ్య డీల్..!
