Fishing Boat Sinks: చేపల వేటకు వెళ్లిన ఓ స్పానిష్ ఓడ ప్రమాదానికి గురైంది. ఈ ఘటనలో ఏడుగురు ప్రాణాలు కోల్పోగా 14 మంది గల్లంతయ్యారు. కెనడాలోని న్యూఫౌండ్లాండ్ తీరానికి సమీపంలో మంగళవారం జరిగిన ఈ దుర్ఘటనలో ముగ్గురు సురక్షితంగా బయటపడ్డారు. ప్రమాదం జరిగిన సమయంలో ఓడలో 24 మంది సిబ్బంది ఉన్నట్లు స్పెయిన్ అధికారులు వెల్లడించారు.
అదే కారణం..
సముద్రంలో ఏర్పడ్డ ప్రతికూల వాతావరణం కారణంగానే ఈ ఓడ ప్రమాదానికి గురైనట్లు అధికారులు వెల్లడించారు. 'విల్లా దే పిటాన్క్సో'గా పిలిచే ఈ ఓడ మునిగిపోవడాన్ని ముందుగా అక్కడే సమీపాన ఉన్న మరో స్పానిష్ ఫిషింగ్ బోట్ సిబ్బంది గుర్తించినట్లు తెలిపారు. కెనడా అధికారుల సహాయంతో గల్లంతైన వారి కోసం గాలింపు చర్యలు ముమ్మరం చేసినట్లు పేర్కొన్నారు. ప్రమాదానికి గురైన ఓడను ఇంకా గుర్తించాల్సి ఉందని తెలిపారు.
ఇదీ చూడండి : సముద్రంలో మునిగిన వ్యక్తికి కరోనా టెస్టులు- 41రోజుల్లో 28సార్లు పాజిటివ్!
