Vijay Parasuram Film : టాలీవుడ్ రౌడీ హీరో విజయ్ దేవరకొండ ప్రస్తుతం చేతినిండా సినిమాలతో బిజీగా ఉన్నారు. 'లైగర్' పరాజయం తర్వాత ఆయన ఎటువంటి సినిమాల్లో నటించనున్నారని ఫ్యాన్స్ ఎదురుచూస్తున్న తరుణంలో 'ఖుషి' సినిమాలో నటిస్తున్నట్లు ప్రకటించారు. శివ నిర్వాణ దర్శకత్వంలో తెరకెక్కుతున్న ఆ సినిమాలో సమంత సరసన విజయ్ నటిస్తున్నారు. 'ఖుషి' కాకుండా మరో రెండు సినిమాలకు సైన్ చేశారు విజయ్. గౌతమ్ తిన్ననూరితో ఓ సినిమాతో పాటు పరశురామ్తోనూ కలిసి పనిచేయనున్నారు. ఈ క్రమంలో ఓ వైపు 'ఖుషి' సినిమా షూటింగ్ బిజీలో ఉన్న ఆయన ఈ రెండు చిత్రాల కోసం రంగంలోకి దిగారు.
ఇక ఈ రెండు ప్రాజెక్ట్లు అనౌన్స్ అయిన తర్వాత అభిమానుల్లో విజయ్ లైనప్పై మరింత ఆసక్తి పెరిగింది. ముఖ్యంగా పరశురామ్ సినిమాపై ఫ్యాన్స్ ఎక్స్పెక్టేషనన్స్ పెంచుకుంటున్నారు. వీరిద్దరి కాంబోలో ఉన్న 'గీతా గోవిందం' సినిమా ఇందుకు కారణం. 2018లో వచ్చిన ఈ సినిమా అటు యూత్తో పాటు ఇటు ఫ్యామిలీ ఆడియన్స్ను ఎంటర్టైన్ చేసి బాక్సాఫీస్ వద్ద మంచి హిట్ అందుకుంది. అంతే కాకుండా విజయ్ కెరీర్ను ఓ మలుపు తిప్పిన సినిమాల్లో 'గీత గోవిందం' కూడా ఒక్కటి. ఆ సినిమా తర్వాత మళ్లీ వీరిద్దరూ తాజాగా కలిశారు. 'VD 13'గా తెరకెక్కుతున్న సినిమా కోసం పని చేసేందుకు రెడీగా ఉన్నారు.
విజయ్-పరశురామ్ కాంబోలో వస్తున్న ఈ సినిమా ఇటీవలే పూజా కార్యక్రమంలో గ్రాండ్గా స్టార్ట్ అయ్యింది. రెగ్యులర్ షూటింగ్ కూడా ప్రారంభం కాకుండానే ఈ సినిమాపై తాజాగా ఓ బజ్ నెట్టింట హల్చల్ చేస్తోంది. 'పెళ్లిచూపులు'... 'గీత గోవిందం' లాంటి సినిమాలతో ఫ్యామిలీ ఆడియన్స్కు చేరువైన విజయ్.. 'ఫ్యామిలీ స్టార్'గా మారనున్నారట. ఈ సినిమాకు మేకర్స్ 'ఫ్యామిలీ స్టార్' అనే పేరును ఖరారు చేయాలనుకుంటున్నారట. ఈ క్రమంలో ఆ పేరును పరిశీలనలో ఉంచారట. అయితే ఈ విషయంపై ఇప్పటి వరకు ఎటువంటి అధికారిక సమాచారం రాలేదు.
ఇక వీరిద్దరి కాంబోలో వస్తున్న సినిమా అయినందున ఇది కూడా 'గీత గోవిందం' తరహాలో హిట్ టాక్ అందుకోనుందంటూ అభిమానులు అంచనాలు పెట్టుకుంటున్నారు. సంక్రాంతి కానుకగా ప్రేక్షకుల ముందుకు తీసుకొచ్చేందుకు మేకర్స్ సన్నాహాలు చేస్తున్నారట. శ్రీ వెంక‌టేశ్వ‌ర క్రియేష‌న్స్ ప‌తాకంపై శిరీష్‌, దిల్‌రాజు సంయుక్తంగా నిర్మిస్తున్న ఈ సినిమా రెగ్యులర్ షూటింగ్ ప్రారంభమైంది. ఇందులో విజయ్ సరసన 'సీతారామం' బ్యూటీ మృణాల్ ఠాకూర్ నటిస్తున్నారు. ఇక ఈ చిత్రానికి గోపీసుందర్‌ సంగీతాన్ని అందిస్తున్నారు.
