హైదరాబాద్లోని జగద్గిరిగుట్ట పోలీస్ స్టేషన్ పరిధిలోని మహాదేవ్పురం చౌరస్తాలో పోలీసులు తనిఖీలు చేపట్టారు. ఈ క్రమంలో ఇద్దరు యువకులు పోలీసులను ఆశ్చర్యపరిచారు. స్విగ్గీ బ్యాగ్లో గంజాయిని తరలిస్తూ అడ్డంగా దొరికిపోయారు. ఆహార పదార్థాలు డెలివరీ చేసే స్విగ్గి బ్యాగ్లో గంజాయిని సరఫరా చేస్తే ఎవ్వరికీ ఎలాంటి అనుమానం రాదన్న నెపంతో ఈ దారి ఎంచుకోవటం.. ఎవ్వరికీ దొరకకుండా ఈ పద్ధతిలోనే సుమారు ఏడాదిగా గంజాయిని సరఫరా చేయటం.. అందరినీ అవాక్కయ్యేలా చేసింది.
స్విగ్గీ బ్యాగును తగిలించుకుని డెలివరీ బాయ్స్లా వెళ్తున్న యువకులపై పోలీసులకు అనుమానం వచ్చి తనిఖీ చేయటంతో.. అసలు విషయం బయటపడిపోయింది. తూర్పుగోదావరి జిల్లా నర్సీపట్నానికి చెందిన వెంకట రమణ, విశాఖపట్నానికి చెందిన సాయి హరి నారాయణ అనే ఇద్దరు యువకులు.. ఏడాది పాటు స్విగ్గీ డెలివరీ బాయ్స్గా పనిచేశారు. ఏడాది క్రితం ఆ పని మానేసి.. గంజాయి దందా మొదలుపెట్టారు. వైజాగ్లోని ఏమిలి రమణ అనే వ్యక్తి దగ్గర నుంచి గంజాయిని తీసుకొస్తారు. కావాల్సిన వారికి గ్రాముల లెక్కన ఎవ్వరికీ అనుమానం రాకుండా.. స్విగ్గి బ్యాగులో తీసుకెళ్లి విక్రయిస్తారు. ఎప్పటిలాగే ఈరోజు కూడా గంజాయి డెలివరీకి వెళ్తున్న ఆ యువకులను చూసిన పోలీసులు.. అనుమానం వచ్చి తనిఖీ చేయగా గంజాయి బయటపడింది. ఇద్దరినీ పోలీసులు అదుపులోకి తీసుకుని.. ఉప్పల్లో వాళ్లు నివాసముంటున్న ఇంట్లో తనిఖీలు చేశారు. మొత్తం 6 కిలోల గంజాయితో పాటు.. రెండు హుక్కాపాట్లు, హుక్కా కాయిల్స్ స్వాధీనం చేసుకున్నారు. ఈ దందాను సుమారు ఏడాదిగా సాగిస్తున్నట్టు పోలీసులు తెలిపారు. ఇద్దరినీ అరెస్ట్ చేసి రిమాండ్కు తరలించినట్లు పోలీసులు తెలిపారు. వైజాగ్కు చెందిన రమణ పరారీలో ఉన్నట్టు పేర్కొన్నారు.
ఇదే రోజు.. మరో గంజాయి సరఫరాదారున్ని పోలీసులు అరెస్టు చేసి నాలుగు కిలోల గంజాయిని స్వాధీనం చేసుకున్నారు. మేడ్చల్ జిల్లా గండిమైసమ్మకు చెందిన సునీల్ ప్రసాద్ చౌదరి అనే వ్యక్తి గత కొంత కాలంగా గంజాయి దందా నడిపిస్తున్నాడు. ఒడిశా నుంచి గంజాయిని తీసుకొచ్చి నగరంలో విక్రయిస్తున్నాడు. రైలులో జనరల్ బోగీలో వెళ్లి వస్తూ.. తెచ్చిన గంజాయిని గ్రాముల లెక్కన అమ్ముతూ.. సొమ్ము చేసుకుంటున్నట్టు పోలీసులు తెలిపారు.
ఇవీ చూడండి:
