Twitter CEO Parag Agrawal: ప్రపంచ అపర కుబేరుడు ఎలాన్ మస్క్ ట్విట్టర్ను హస్తగతం చేసుకున్న అనంతరం తమ భవిత్యత్తు ఏంటని ఆందోళన చెందుతున్నారు ఆ సంస్థ ఉద్యోగులు. ఈ విషయమై సంస్థ సీఈఓ పరాగ్ అగర్వాల్ స్పందించాలని ఒత్తిడి చేస్తున్నారు. ఉద్యోగుల గురించి సంస్థ ఆలోచిస్తోందని.. అయితే ఒప్పందం పూర్తైన తర్వాత ఏం జరుగుతుందో ఇప్పుడే ఊహించలేమన్నారు కార్యనిర్వహక సభ్యులు. శుక్రవారం టౌన్ హాల్లో సమావేశం జరగగా.. ఈ విషయంపై సీఈఓ పరాగ్ అగర్వాల్ సమాధానం చెప్పాలని ఉద్యోగులు డిమాండ్ చేశారు.
ఒప్పందం ముగిసిన అనంతరం చాలా మంది ఉద్యోగాలు పోయే అవకాశం ఉందని.. దీనిపై సంస్థ ఎలాంటి చర్యలు తీసుకుంటుందని ఓ ఉద్యోగి సీఈఓ పరాగ్ అగర్వాల్ను సూటిగా ప్రశ్నించారు. దీనిపై స్పందించిన అగర్వాల్.. ఉద్యోగులు, వినియోగదారుల భవిష్యత్తు గురించి ట్విట్టర్ శ్రద్ధ వహిస్తుందని బదులిచ్చారు. మరోవైపు ట్విట్టర్కు కొత్త సీఈఓను నియమించేందుకు ఎలాన్ మస్క్ సిద్ధమైనట్లు తెలుస్తోంది. గతేడాది తన ఆర్థిక చెల్లింపుల సంస్థపై దృష్టిసారించేందుకు ట్విట్టర్ నుంచి తప్పుకున్న సంస్థ సహ వ్యవస్థాపకుడు జాక్ డోర్సీని నియమిస్తారనే ప్రచారంలో ఉంది.
ట్విట్టర్ను కొనుగోలు చేయడానికి ఎలాన్ మస్క్.. 44 బిలియన్ డాలర్లకు బిడ్ దాఖలు చేశారు. అయితే కొత్త యాజమాన్యం వచ్చే వరకు ఉద్యోగాల కోతపై నిర్ణయాలు తీసుకోమని సీఈఓ అగర్వాల్ గతంలోనే చెప్పారు. క్యాపిటల్ హిల్ హింసాకాండ కథనాలను ట్విట్టర్ సెన్సార్ చేయడంపై మస్క్ అసంతృప్తితో ఉన్నారు. మస్క్ ఉద్యోగులను తొలగించే అవకాశం ఉందని కొన్ని వార్తా సంస్థలు అంచనా వేశాయి.
ఇదీ చదవండి: ట్విట్టర్ కోసం టెస్లా షేర్లను అమ్మిన మస్క్.. ఆందోళనలో ఇన్వెస్టర్లు!
