ప్రస్తుతం కొనసాగుతున్న కరోనా సంక్షోభంలో దాదాపు సగం భారతీయ కుటుంబాలు అప్పుల ద్వారానే పూట గడుపుతున్నట్లు ఓ నివేదిక తెలిపింది.
కరోనా కారణంగా ఉద్యోగాలు కోల్పోవడం, వేతనాల్లో కోతలతో తక్కువ ఆదాయం కలిగిన మధ్య తరగతి వర్గాలు తీవ్రంగా ప్రభావితమయ్యాయని నివేదిక పేర్కొంది. ఈ పరిణామంతో అప్పులు తీసుకునే ధోరణి పెరిగిందని హోం క్రెడిట్ ఇండియా తాజా నివేదికలో వివరించింది.
కరోనా వల్ల విధించిన లాక్డౌన్ సమయంలో అప్పుల ధోరణిని అర్థం చేసుకునేందుకు దేశవ్యాప్తంగా ఏడు నగరాల్లో 1,000 మందికిపైగా ఈ సర్వే జరిగింది.
నివేదికలోని ముఖ్యాంశాలు..
- దేశంలో 46 శాతం మంది తమ ఇంటి అవసరాలకు అప్పులు తీసుకున్నారు.
- వేతనాల్లో కోత లేదా ఆలస్యం వంటివి చాలా మంది రుణాలు తీసుకునేందుకు ప్రధాన కారణం.
- పాత రుణాలు తీర్చడం, ఈఎంఐల చెల్లించడం కోసం అప్పులు తీసుకున్నట్లు 27 శాతం మంది తెలిపారు.
- 14 శాతం మంది ఉద్యోగం పోవడం వల్ల రుణాలు తీసుకోవాల్సి వచ్చినట్లు చెప్పారు.
- పరిస్థితులు సాధారణ స్థితికి వచ్చాక అప్పును తిరిగి చెల్లించే సౌలభ్యం కోసం.. కరోనా కాలంలో చాలా మంది స్నేహితులు, బంధువుల అప్పు తీసుకునేందుకు మొగ్గు చూపారు.
- మళ్లీ ఉద్యోగంలో చేరాక, పరిస్థితులు సాధారణ స్థితికి వచ్చినప్పుడు తీసుకున్న అప్పులు చెల్లిస్తామని 50 శాతం మంది చెప్పారు.
- ముంబయి, భోపాల్లో అత్యధికంగా 27 శాతం మంది స్నేహితులు, బంధువుల నుంచి అప్పులు తీసుకున్నట్లు తెలిపారు. ఆ తర్వాతి స్థానాల్లో దిల్లీ (26 శాతం), పట్నా (25 శాతం) ఉన్నాయి.
- అప్పులు తీసుకునే విషయంలో కుటుంబంలో పురుషులే నిర్ణయం తీసుకున్నట్లు 23 శాతం మంది వెల్లడించారు.
ఇదీ చూడండి:అక్కరకు రాని ఉద్దీపన- చేకూరని ప్రయోజనం!
