రాధాకిషన్ దమానీ.. స్టాక్మార్కెట్లో మదుపరులకు సుపరిచితమైన పేరు. ఆయనను మరో విధంగా చెప్పుకోవచ్చు. డీమార్ట్ వ్యవస్థాపకుడు కూడా ఆయనే. నాలుగైదు నెలల క్రితం చెన్నై కేంద్రంగా కార్యకలాపాలు సాగిస్తున్న ఇండియా సిమెంట్స్లో 10శాతానికి పైగా వాటా కొనుగోలు చేసి అందరి దృష్టిని ఆకర్షించిన అగ్రశ్రేణి ఇన్వెష్టర్ కూడా. లక్ష కోట్ల రూపాయలకు పైగా సంపదతో ఫోర్బ్స్ ఇండియా 2020 కుబేరుల జాబితాలో స్థానం దక్కించుకున్న ఘనత ఆయన సొంతం. తాజాగా ఆయన మరొక సంచలనంతో జనం దృష్టిని ఆకర్షించారు. ముంబయిలోని అత్యంత ఖరీదైన మలబార్ హిల్ ప్రాంతంలో రూ.1000 కోట్లు పెట్టి ఓ ఖరీదైన ఇంటిని కొనుగోలు చేశారు.
నారాయణ్ దాభోల్కర్ మార్గ్లో ఉన్న మధు కుంజ్ అనే భవంతిని ప్రేమ్చంద్ రాయ్చంద్ అండ్ సన్స్ నుంచి తన సోదరుడితో కలిసి దమానీ సొంతం చేసుకున్నారు. ఈ ఇల్లు దాదాపు 5752 చదరపు గజాల విస్తీర్ణంలో ఉంది. దీనికి ఆయన స్టాంప్ డ్యూటీనే రూ.30 కోట్లు చెల్లించారు. ఒకప్పుడు ఆయన ఒకే గదిలో ఉండటం విశేషం.
ఈ లావాదేవీ ముంబయి రియల్ ఎస్టేట్ మార్కెట్లో ఇటీవల కాలంలో నమోదైన అతిపెద్దదిగా సంబంధితి వర్గాలు పేర్కొంటున్నాయి. కొవిడ్ కారణంగా గతేడాది ముంబయి రియల్ ఎస్టేట్ మార్కెట్ పడిపోయినప్పటికీ మళ్లీ కోలుకుంటోందని, తాజా ఉదంతమే అందుకు కారణమని వివరిస్తున్నాయి. దమానీ ఇటీవలే ఠానేలో 8 ఎకరాల స్థలాన్ని మాండెలెజ్ ఇండియా (గతంలో కాడ్బరీ ఇండియా) నుంచి రూ.250 కోట్లకు కొనుగోలు చేశారు.
ఇదీ చూడండి: దమ్మున్న 'డీమార్ట్' దమానీ
