తమిళనాడు కన్యాకుమారి కుత్తైకాడు పలవిలైలో విషాద ఘటన జరిగింది. రోజూ తొగిచ్చి ఇంట్లో గొడవ చేసే నాన్న కొడతాడనే భయంతో ఓ చిన్నారి పెరట్లో దాక్కోగా.. విష సర్పం ఆమెను కాటేసింది. వెంటనే ఆస్పత్రికి తరలించగా చికిత్స పొందుతూ ఆ బాలిక కన్నుమూసింది. దీంతో ఆమె తల్లి శోకసంద్రంలో మునిగిపోయింది. విషయం తెలిసి గ్రామస్థులు కూడా పెద్ద సంఖ్యలో చిన్నారి ఇంటికి చేరుకున్నారు. మంగళవారం రాత్రి ఈ ఘటన జరిగింది.
ఈ గ్రామంలో సురెందిన్ అనే వ్యక్తి రోజు కూలీగా పని చేస్తున్నాడు. అతని భార్య సిజిమోల్. వీరికి ముగ్గురు పిల్లలు సుశ్విన్ సిజో(12), సుజిలిన్ జో(9), సుశ్విక మోల్(4) ఉన్నారు. సురెందిన్ తాగుడుకు బానిసయ్యాడు. రోజూ రాత్రి ఫుల్లుగా మద్యం సేవించి భార్య, పిల్లలను కొడతాడు. మంగళవారం రాత్రి కూడా ఇలాగే తాగొచ్చాడు. భార్యను కొడుతుండగా.. పిల్లలు భయపడి ఇంట్లో నుంచి పారిపోయారు. దగ్గర్లోని చెట్ల పొదల్లో దాకున్నారు. అక్కడే నిద్రపోయారు. అయితే ఓ విష సర్పం.. సుశ్విక నిద్రలో ఉండగా కాటేసింది. ఆ తర్వాత ఆమెను సమీపంలోని ఆస్పత్రికి తరలించారు. చికిత్స పొందుతూ చిన్నారి ప్రాణాలు కోల్పోయింది. ఘటనా స్థలానికి చేరుకున్న పోలీసులు కేసు నమోదు చేసి దర్యాప్తు చేపట్టారు.
ఇదీ చదవండి: ప్రభుత్వ ఆస్పత్రిలో 50 మంది నర్సులపై లైంగిక వేధింపులు!
