బలవంతపు మతమార్పిళ్లకు అడ్డుకట్ట వేసేందుకు 'లవ్ జిహాద్' చట్టం చేసుకొచ్చిన రాష్ట్రాల్లో త్వరలోనే గుజరాత్ చేరనుంది. ఇలాంటి మతమార్పిళ్లను అరికట్టేందుకు కఠినమైన చట్టాన్ని త్వరలోనే ఆమోదించనున్నట్టు ఆ రాష్ట్ర ముఖ్యమంత్రి విజయ్ రూపానీ ప్రకటించారు. మున్సిపల్ ఎన్నికల ప్రచారంలో భాగంగా వడోదర ర్యాలీలో పాల్గొన్న రూపానీ.. గుజరాత్లో స్వర్ణయుగం నడుస్తోందన్నారు.
" శాసనసభ సాక్షిగా లవ్ జీహాద్ చట్టాన్ని తీసుకురాబోతున్నాం. ఇకపై ఇటువంటి కార్యకలాపాలను సహించబోము. భాజపా నేతృత్వంలో ఈ ఆగడాలపై కఠినమైన చట్టాలను తీసుకువస్తాం."
-విజయ్ రూపానీ, గుజరాత్ సీఎం
బలవంతపు మతమార్పిళ్లకు అడ్డుకట్ట వేసేందుకు భాజపా పాలిత రాష్ట్రాలైన ఉత్తర్ప్రదేశ్, మధ్యప్రదేశ్లు ఈ తరహా చట్టాలను చేశాయి.
గుండా యాక్ట్..
సాధారణ ప్రజలను రౌడీల బారినుంచి తప్పించేందుకు.. 'గుండా'(అసాంఘిక) నిరోదక చట్టాన్ని చేశామని రూపానీ గుర్తుచేశారు. ఈ మేరకు అసాంఘిక కార్యకలాపాలకు పాల్పడేవారికి 10-14ఏళ్ల జైలు శిక్షను విధించే కఠిన నిబంధనలు పొందుపరిచామన్నారు. అలాగే రాష్ట్రంలో కబ్జాలను నిరోధించేందుకు సైతం చట్టం చేశామన్నారు.
స్వర్ణయుగం..
గుజరాత్ పాలనలో ప్రస్తుతం స్వర్ణయుగం నడుస్తోందన్నారు రూపానీ. కేంద్రాన్ని ఏది అడిగినా.. కాదనకుండా ఇస్తుందని తెలిపారు. గతంలో అధికారంలో ఉన్న కాంగ్రెస్ ప్రభుత్వం నర్మదా డ్యాం గేట్లు ఎత్తడానికి కూడా అనుమతులను ఇచ్చేది కాదని దుయ్యబట్టారు. మోదీ అధికారంలోకి వచ్చిన 17 రోజుల్లోనే గుజరాత్ అభివృద్ధికి గేట్లు తెరిచారని తెలిపారు.
ఇదీ చదవండి: 'లవ్ జిహాద్' చట్టాల పరిశీలనకు సుప్రీం ఓకే
