Dacoit Kalli Gurjar in Morena: మధ్యప్రదేశ్ చంబల్ ప్రాంతంలో బందిపోట్లు.. కిడ్నాప్లు, దోపిడీలు, దొంగతనాలు వంటివి చేస్తారని చాలా సార్లు వినేవుంటారు. కానీ, ఓ బందిపోటు దొంగ తన వృత్తికి సంబంధం లేని ఓ కొత్త పని చేసి వార్తల్లో నిలిచాడు. తన మనసు దోచిన ఓ అమ్మాయిని పెళ్లి చేసుకునేందుకు తన బలాన్ని చూపించాడు. యువతి ఇంటికి వెళ్లి ఆమె తండ్రిని చితకబాది పెళ్లి చేసుకుంటానని వార్నింగ్ ఇచ్చాడు. పాయింట్ బ్లాంక్లో గన్ పెట్టి కూతుర్ని ఇస్తావా లేదా చస్తావా? అంటూ బెదిరించాడు.
ఇదీ జరిగింది: కల్లి గుర్జార్ అనే బందిపోటు దొంగను పట్టుకునేందుకు పోలీసులు ఇప్పటికే వెతుకుతున్నారు. అతడిపై రూ.15వేల రివార్డ్ సైతం ప్రకటించారు. ఈ క్రమంలోనే ఓ యువతి కల్లి గుర్జార్ మనసును దోచుకుంది. ఆమెను చూసి ప్రేమలో పడిపోయాడు. పెళ్లి చేసుకోవాలని గట్టిగా సంకల్పించుకున్నాడు. కానీ, ఆ యువతి తండ్రి వేరే వ్యక్తితో పెళ్లి నిశ్చయించాడు. ఈ విషయం తెలుసుకున్న కల్లి గుర్జార్ ఆగ్రహంతో ఊగిపోయాడు. గురువారం రాత్రి యువతి ఇంటికి తన గ్యాంగ్తో వెళ్లాడు. ఆమె తండ్రిని చితకబాదాడు. కూతురిని తనకు ఇచ్చి పెళ్లి చేయాలని ఒత్తిడి చేశాడు. ఆ తర్వాత గ్రామస్థులను భయపెట్టేందుకు కాల్పులు సైతం జరిపాడు.
పహాడగఢ్ పోలీస్ స్టేషన్ పరిధిలోని స్యాహీ టేక్ గ్రామంలో ఈ సంఘటన జరిగింది. గోపాల్ గుర్జార్ అనే వ్యక్తి కుమార్తెను ప్రేమించాడు కల్లి గుర్జార్. తనను పెళ్లి చేసుకోకపోతే కుటుంబం మొత్తాన్ని చంపేస్తానని బెదిరించాడు. కాల్పులతో భయబ్రాంతులకు గురైన గ్రామస్థులు వెంటనే పోలీసులకు సమాచారం అందించారు. ఫిర్యాదు అందుకున్న పోలీసులు కల్లి గుర్జార్ కోసం గాలిస్తున్నారు. 'కల్లి గుర్జార్ సహా అతడి సహాయకులపై కేసు నమోదైంది. వారిపై ఇప్పటికే చాలా కేసులు ఉన్నాయి. వారిని పట్టుకునేందుకు అటవీ ప్రాంతంలో గాలింపు చర్యలు కొనసాగుతున్నాయి.' అని ఏఎస్పీ రైసింగ్ నర్వారియా తెలిపారు.
ఇదీ చూడండి: దండలు మార్చుకున్నారు.. కాసేపట్లో మూడు ముళ్లు.. ఇంతలోనే వధువును కాల్చి చంపి..
