Two Mens Died: తిరుపతి బ్రిడ్జి నిర్మాణ పనుల్లో ప్రమాదం.. ఇద్దరు వలస కార్మికులు మృతి

Two Men Died In Srinivasa Sethu Bridge Works: తిరుపతి స్మార్ట్ సిటీ, టీటీడీ సంయుక్తంగా నిర్మిస్తున్న.. రైల్వే ఫ్లైఓవర్​ బ్రిడ్జి పనుల్లో ఆర్టీసీ బస్టాండ్ సమీపంలో  అపశృతి చోటు చేసుకుంది.  రైలింగ్​పై సెగ్మెంట్ అమర్చుతున్న సమయంలో ప్రమాదం జరిగి ఇద్దరు వలస కూలీలు ప్రాణాలు కోల్పోయారు.  శ్రీనివాస సేతు రైల్వే ఫ్లైఓవర్ పై జరుగుతున్న పనుల్లో భాగంగా.. అర్ధరాత్రి  రైలింగ్​పై సెగ్మెంట్​ను అమర్చేందుకు ఎత్తుతుండగా క్రేన్ రోప్ తెగడంతో.. సెగ్మెంట్లు కిందపడ్డాయి. ఈ క్రమంలో అక్కడే పనిచేస్తున్న ఇద్దరు కూలీలపై సెగ్మెంట్ పడిపోయింది. దీంతో దానికింద చిక్కుకున్న ఇద్దరు కూలీలు మరణించారు. సమాచారం అందుకున్న పోలీసులు ఘటనాస్థలానికి చేరుకుని కేసు నమోదు చేశారు. మృతులు  పశ్చిమ బెంగాల్​కు చెందిన బిజిత్, బీహార్ కు చెందిన బార్డో మండల్​గా గుర్తించారు. అర్ధరాత్రి ప్రమాదం జరగడంతో ఐదు గంటల పాటు శ్రమించి.. మృతదేహాలను వెలికితీసి రుయా ఆస్పత్రికి తరలించారు. తిరుపతి నగరపాలక సంస్థ కమిషనర్ హరిత ఎమ్మెల్యే కరుణాకర్ రెడ్డి ఘటనాస్థలాన్ని పరిశీలించారు. బాధిత కుటుంబాలకు న్యాయం చేస్తామని హామీ ఇచ్చారు.