విశాఖ జిల్లా కోటవురట్ల మండలం చౌడువాడలో 9 మంది గ్రామ వాలంటీర్లను తొలగించారు. పంచాయతీ పరిధిలో పింఛన్ల పంపిణీలో అవకతవకలపై కలెక్టర్ మల్లిఖార్జున ఆగ్రహం వ్యక్తం చేశారు. ఈ వ్యవహారంలో తొమ్మిది మంది గ్రామ వాలంటీర్లను కలెక్టర్ విధుల నుంచి తొలగించారు.
ఈ ఘటనకు బాధ్యుల్ని చేస్తూ.. గ్రామ సచివాలయ సంక్షేమ సహాయకుడిని సస్పెండ్ చేశారు. సర్పంచ్ను సైతం మూడు నెలలపాటు విధుల నుంచి సస్పెండ్ చేశారు. అటు పంచాయతీ కార్యదర్శి జె.వి.పరమేశ్వరరావుకు సైతం షోకాజ్‌ నోటీసు జారీ చేశారు.
పింఛను అందజేసినందుకు.. పింఛనుదారుల నుంచి డబ్బులు వసూలు చేసినందుకు కలెక్టర్ ఈ చర్యలు తీసుకున్నారు. ఇలాంటి చర్యలను ఉపేక్షించేది లేదని, లబ్ధిదారుల నుంచి ఎవరైనా డబ్బు వసూలుచేస్తే.. కఠిన చర్యలు తీసుకుంటామని కలెక్టర్ మల్లిఖార్జున హెచ్చరించారు.
ఇదీ చదవండి: సచివాలయ సిబ్బంది చేతివాటం.. పింఛన్లో వెయ్యి రూపాయల కోత!
