వైద్యుల నిర్లక్ష్యంతో శిశువు మృతి.. బాధితుల ఆందోళన

వైద్యుల నిర్లక్ష్యంతో శిశువు మృతి చెందిందని తిరువూరు ప్రాంతీయ ఆసుపత్రిలో కుటుంబ సభ్యులు ఆందోళనకు దిగారు. తల్లికి జ్వరం రావడం వల్లే బిడ్డ చనిపోయిందని వైద్యులు చెబుతున్నారు. సమాచారం తెలుసుకున్న స్థానిక ఎమ్మెల్యే ఆసుపత్రికి వచ్చి బాధితులకు సంఘీభావం తెలిపి సర్దిచెప్పారు.

వైద్యుల నిర్లక్ష్యం కారణంగా శిశువు మృతి చెందిందని ఆరోపిస్తూ కృష్ణాజిల్లా తిరువూరు ప్రాంతీయ వైద్యశాల ఎదుట కుటుంబ సభ్యులు ఆందోళన చేపట్టారు. జిల్లాలోని కొమిరెడ్డిపల్లికి చెందిన మహిళను కాన్పు నిమిత్తం కుటుంబ సభ్యులు 5 రోజుల క్రితం తిరువూరు ఆసుపత్రిలో చేర్చారు. ఈ నెల 2న ఆపరేషన్ చేయాల్సి ఉండగా... గాంధీ జయంతి పేరిట వైద్యులు విధులకు హాజరు కాలేదని కుటుంబ సభ్యులు ఆరోపించారు. హడావిడిగా శుక్రవారం వైద్యం చేయడం వలన శిశువు మరణించిందని కుటుంబ సభ్యులు అంటున్నారు. బాధిత కుటుంబానికి న్యాయం చేయాలని కోరుతూ... ఆసుపత్రి ఎదుట ఆందోళన చేపట్టారు. సమాచారం అందుకున్న ఎమ్మెల్యే రక్షణనిధి... ఆసుపత్రికి చేరుకొని బాధితులతో మాట్లాడారు. శిశువు మరణించడానికి కారణాలపై ఆరా తీశారు. తల్లి జ్వరంతో బాధపడటం వల్లే శిశువు చనిపోయిందని వైద్యులు వివరణ ఇచ్చారు. ఎమ్మెల్యే సర్దిచెప్పటంతో కుటుంబ సభ్యులు ఆందోళన విరమించారు. ఇలాంటి ఘటనలు భవిష్యత్తులో పునరావృతం కాకుండా జాగ్రత్తలు తీసుకోవాలని ఎమ్మెల్యే వైద్యులకు సూచించారు.

ఇదీ చదవండి :

తండ్రిపై పోలీసులకు ఎనిమిదేళ్ల బాలుడు ఫిర్యాదు