'మంత్రి కొడాలి నానిపై చర్యలు తీసుకోవాలి'

రాష్ట్ర పౌరసరఫరాల శాఖ మంత్రి కొడాలి నానిపై చర్యలు తీసుకోవాలని తెనాలి డీఎస్పీ స్రవంతిరాయ్​కు గుంటూరు జిల్లా తెదేపా నాయకులు వినతిపత్రం అందించారు. తెదేపా అధినేత చంద్రబాబు, పార్టీ జాతీయ ప్రధాన కార్యదర్శి లోకేశ్​పై మంత్రి కొడాలి నాని చేసిన వ్యాఖ్యాలకు అతనిపై కేసు నమోదు చేయాలని కోరారు.

తెదేపా అధినేత చంద్రబాబు, పార్టీ జాతీయ కార్యదర్శి నారా లోకేశ్​పై మంత్రి కొడాలి వెంకటేశ్వరరావు(నాని) చేసిన వ్యాఖ్యలను పార్టీ కార్యకర్తలు ఖండించారు. మాటల ద్వారా రెచ్చగొట్టి, దాడి చేసేందుకు ప్రేరేపించే విధంగా వైకాపా నేతలు విమర్శలు చేశారన్నారు. అందుకు తెదేపా కార్యకర్తల మనోభావాలు దెబ్బతిన్నాయని పార్టీ పట్టణ మాజీ అధ్యక్షుడు మహమ్మద్​ ఖుద్దుస్ పేర్కొన్నారు.

వైకాపా నేతలు చేసిన విమర్శలు ప్రజాస్వామ్యంలో క్షమించరానివన్నారు. దీన్ని నేరంగా పరిగణిస్తూ కొడాలి నానిపై క్రిమినల్ కేసు నమోదు చేసి, అరెస్టు చేయాలని డిమాండ్​ చేశారు. ఈ మేరకు డీఎస్పీ స్రవంతి రాయ్​కి వినతి పత్రం అందించారు. ఉన్నతాధికారులకు విషయం తెలియజేసి.. తదుపరి చర్యలు తీసుకుంటామని డీఎస్పీ తెలిపారు.

ఇదీ చదవండి: Chandrababu letter to DGP: 'దాడికి గురైన దళితులపైనే అక్రమ కేసులు'