గుంటూరులోని ఆంధ్రా-ఇవాంజిలికల్ లూథరన్ చర్చ్ సంస్థ గత ఏడాది మేలో నూతన కార్యవర్గాన్ని ఎన్నుకుంది. అయితే.. నూతన కార్యవర్గాన్ని కార్యాలయంలోకి రాకుండా కొందరు వ్యక్తులు అడ్డుకుంటున్నారని.. రౌడీల చేత దాడులకు పాల్పడుతున్నారని నూతన కార్యవర్గ సభ్యులు ఆవేదన వ్యక్తం చేస్తున్నారు. దీనిపై హైకోర్టును ఆశ్రయించగా నూతన కార్యవర్గం కార్యాలయంలోకి వెళ్లవచ్చని ఈనెల 16న స్పష్టమైన తీర్పు ఇచ్చిందని, అయినా.. తమని కార్యాలయంలోకి వెళ్లనీయకుండా అడ్డుకుంటున్నారని, వారు గుంటూరు అర్బన్ ఎస్పీ కార్యాలయంలో ఫిర్యాదు చేశారు.
తమకు న్యాయం చేయాలని కోర్టు తీర్పు ప్రకారం కార్యాలయంలోకి అనుమతించేలా చూడాలని కోరారు. అనంతరం లాడ్జి సెంటర్ లోని అంబేద్కర్ విగ్రహం వద్ద ధర్నా చేశారు. బ్రదర్ అనిల్తోపాటు హోంమంత్రి సుచరిత తమను అడ్డుకుంటున్నవారికి మద్దతిస్తున్నారని ఆరోపించారు. తమని అనుమతించేంత వరకూ ఆందోళన కొనసాగిస్తామని చెప్పారు.
