విశాఖపట్నం, తూర్పుగోదావరి జిల్లాల్లో భారీ వర్షాలు కరుస్తున్నాయి. కుండపోతగా కురుస్తున్న వర్షాలకు జలశయాలు పూర్తిస్థాయిలో నిండిపోయాయి. విశాఖలోని తాండవ జలాశయ నీటిమట్టం 380 అడుగులు కాగా ప్రస్తుతం 365 అడుగులకి నీరు చేరుకుంది. గడచిన ఐదేళ్లతో పోలిస్తే నీటిమట్టం గణనీయంగా పెరిగింది. ఈ జలాశయం ద్వారా 52 వేల ఎకరాల భూమి సాగవుతోందని...నీరు పుష్కలంగా ఉండటంతో వచ్చే ఏడాదికి సైతం నీటి సమస్య ఉండదని అధికారులు చెబుతున్నారు. మాడుగుల నియోజకవర్గంలోని జలాశయాలు సైతం ప్రమాద స్థాయికి చేరుకున్నాయి. పెద్దేరు, కోనాం, రైవాడ జలాశయాలు పూర్తిగా నిండిపోవడంతో గేట్లు ఎత్తి అదనపు నీటిని దిగువకు విడుదల చేస్తున్నారు.
తూర్పుగోదావరి జిల్లా కోనసీమ ప్రాంత ప్రజలు కుండపోత వర్షాలకు వణికిపోతున్నారు. రెండు రోజులుగా కురుస్తున్న వర్షాలకు రహదారులు జలమయమై వాహనచోదకులు ఇక్కట్లు పడుతున్నారు. వర్షాల కారణంగా జనజీవనం పూర్తిగా స్తంభించిపోయింది. లోతట్టు ప్రాంతాలలో నీరు నిలిచిపోయి ప్రజలు ఇబ్బందులు ఎదుర్కొంటున్నారు.
