Rohith Sharma Asia Cup: యూఏఈ వేదికగా ఆగస్టు 27 నుంచి జరగనున్న ఆసియకప్‌కు టీమ్ఇండియా సిద్ధమవుతోంది. భారత తన తొలి మ్యాచ్‌లో చిరకాల ప్రత్యర్థి పాకిస్థాన్‌తో ఆగస్టు 27న దుబాయ్‌ వేదికగా తలపడనుంది. కాగా ఆసియా కప్కు ముందు భారత క్రికెట్ జట్టు కెప్టెన్‌ రోహిత్ శర్మను పలు అరుదైన రికార్డులు ఊరిస్తున్నాయి.
ఆసియా కప్లో అత్యధిక పరుగులు సాధించిన భారత ఆటగాళ్ల జాబితాలో 971 పరుగులతో మాస్టర్ బ్లాస్టర్ సచిన్ తెందూల్కర్ తొలి స్థానంలో ఉన్నాడు. ఇక 883 పరుగులతో రెండో స్థానంలో రోహిత్.. మరో 89 పరుగులు సాధిస్తే సచిన్ను అధిగమించి అగ్రస్థానానికి చేరుకుంటాడు. అదే విధంగా రోహిత్ మరో 117 పరుగులు చేస్తే ఆసియా కప్లో 1000 పరుగులు చేసిన తొలి భారత ఆటగాడిగా నిలుస్తాడు. దాంతో పాటు ఆసియాకప్‌లో వెయ్యి పరుగుల సాధించిన వారి జాబితాలో రోహిత్ మూడో స్థానానికి చేరుకుంటాడు.
ఈ అరుదైన ఘనత సాధించిన జాబితాలో 1220 పరుగులతో శ్రీలంక దిగ్గజం సనత్ జయసూర్య టాప్‌లో ఉండగా.. 1075 పరుగులతో మరో శ్రీలంక దిగ్గజ ఆటగాడు కుమార్ సంగక్కర కొనసాగుతున్నాడు. సనత్ జయసూర్య రికార్డును రోహిత్ బ్రేక్ చేయాలంటే 338 పరుగులు సాధించాలి. ఈ మెగా టోర్నీలో భారత్‌ ఆరు మ్యాచ్‌లు ఆడనుంది. కాబట్టి జయసూర్య రికార్డును హిట్మ్యాన్ బ్రేక్ చేసే అవకాశం ఉంది. ఇక ఇప్పటి వరకు ఆసియా కప్లో 27 మ్యాచ్‌లు ఆడిన రోహిత్ శర్మ.. 883 పరుగులు సాధించాడు. అతడి ఇన్నింగ్స్‌లలో 7 హాఫ్‌ సెంచరీలు, ఒక సెంచరీ ఉన్నాయి.
ఇవీ చదవండి: ధోనీ షాకింగ్ నిర్ణయానికి అప్పుడే రెండేళ్లు, మరోసారి రిటైర్మెంట్‌ టైమ్‌ వైరల్
