Rohit Sharma IPL Ducks : ఐపీఎల్లో ముంబయి ఇండియన్స్ జట్టు సారథి రోహిత్ శర్మ.. ఐపీఎల్ చరిత్రలోనే అత్యంత చెత్త రికార్డు నమోదు చేశాడు. శనివారం చెన్నైతో జరిగిన మ్యాచ్లో డకౌట్ అయిన రోహిత్.. ఐపీఎల్ మొత్తం 16 సార్లు ఇలా ఔట్ అయ్యాడు. దీంతోపాటు అత్యధిక సార్లు డకౌట్ అయిన కెప్టెన్ (11)గా రికార్డు మూడగట్టుకున్నాడు. దీంతో అత్యధికంగా డకౌట్ అయిన ప్లేయర్లలో మొదటి స్థానంలో నిలిచాడు. అత్యధికంగా డకౌట్ అయిన ఆటగాళ్ల జాబితాలో రోహిత్ తర్వాత స్థానాల్లో.. సునీల్‌ నరైన్‌ (15), మన్‌దీప్‌ సింగ్‌ (15), దినేశ్‌ కార్తీక్‌ (15), అంబటి రాయుడు (14) ఉన్నారు.
4 మ్యాచ్ల్లో 5 పరుగులు..
అంతకుముందు జరిగిన మ్యాచ్ల్లో.. ఏ ఒక్క మ్యాచ్లోనూ 10కి పైన పరుగులు చేయలేదు. పైగా నాలుగు మ్యాచ్ల్లో కలిపి కేవలం 5 పరుగులు మాత్రమే చేశాడు. శనివారం చెన్నైతో జరిగిన మ్యాచ్లో సున్నా పరుగులకే పెవిలియన్ చేరాడు. అంతకుముందు మే 3న పంజాబ్తో జరిగిన మ్యాచ్లో కూడా ఖాతా తెరవకుండానే వెనుదిరిగాడు. ఇక, ఏప్రిల్ 30న రాజస్థాన్ రాయల్స్తో జరిగిన మ్యాచ్లో కేవలం మూడు పరుగులు చేసి ఔట్ అయ్యాడు. దానికి ముందు ఏప్రిల్ 25న పంజాబ్తో జరిగిన మ్యాచ్లో 2 పరుగులకే చేతులెత్తేశాడు. ఇలా వరుసగా విఫలమవుతున్న రోహిత్పై విమర్శలు వెల్లువెత్తున్నాయి. అతడు ఫామ్పైనా అభిమానులు సందేహాలు వ్యక్తం చేస్తున్నారు.
కాగా, శనివారం చెన్నైతో జరిగిన మ్యాచ్లో టాస్ ఓడి మొదట బ్యాటింగ్ చేసిన ముంబయి ఇండియన్స్.. స్వల్ప స్కోరుకే వెనుదిరిగింది. నిర్ణీత 20 ఓవర్లలో 8 వికెట్ల నష్టానికి 139 పరగులు చేసింది. చెన్నై సూపర్ కింగ్స్కు 140 పరుగుల లక్ష్యాన్ని నిర్దేశించింది. అయితే, మొదటి నుంచి ముంబయి తడబడింది. ఓపెనర్లు కామెరూన్ గ్రీన్ (6), ఇషాన్ కిషన్ (7) పేలవ ప్రదర్శన చేశారు. ఆ తర్వాత వచ్చిన రోహిత్ (0) ఖాతా తెరవకుండానే వెనుదిరిగాడు. అనంతరం క్రీజులోకి దిగిన నేహల్ వధేరా (64) జట్టును కాపాడాడు. 8 ఫోర్లు ఒక సిక్స్తో చెలరేగిపోయాడు. అతడు ఔట్ అయిన తర్వాత సూర్య కుమార్ (26), స్టబ్స్ (20) ఫర్వాలేదనిపించారు. టిమ్ డేవిడ్ (2), అర్షద్ ఖాన్ (1) జోఫ్రా ఆర్చర్ (3*), చావ్లా (2*) పరుగులు చేసి వెనుదిరిగారు. ఇక, చెన్నై బౌలర్లలో మతీశ పతిరణ (3) వికెట్లతో చెలరేగిపోయాడు. చాహర్, తుశార్ రెండు చొప్పున వికెట్లు తీశారు. జడేజా ఒక వికెట్ పడగొట్టాడు.
