ఈ ఉరుకుల పరుగుల జీవితంలో స్వయంపాకం రుచి చూడడానికి సమయం దొరకడం లేదు. అందుకే చాలా మంది రెండు నిమిషాల్లో రెడీ అయ్యే మ్యాగీ లాంటి ఇన్స్టంట్ ఫుడ్కు అలవాటు పడ్డారు. ఇదే కోవకు చెందే వాటిలో మరొకటి ఓట్స్. దీనితో తయారు చేసే కట్లెట్ను నోట్లో వేసుకుంటే.. ఎవరైనా వవ్హా.. అనాల్సిందే. ఇలాంటి ఓట్స్ కట్లెట్ను ఎలా తయారు చేస్తారో తెలుసుకుందామా?
కావాల్సిన పదార్థాలు..
- కప్పు ఓట్స్
- అర కప్పు పనీర్
- నాలుగు టీ స్పూన్ల క్యారెట్ తురుము
- కప్పు బంగాళాదుంప
- టీ స్పూన్ అల్లం పేస్ట్
- రెండు టేబుల్స్పూన్ల వంట నూనె
- తగినంత ఉప్పు
- సగం టీ స్పూన్ గరం మసాలా పొడి
- టీ స్పూన్ కారం
- టీ స్పూన్ పచ్చిమిర్చి
తయారు చేసుకునే విధానం..
- ముందుగా బంగాళదుంపల్ని తీసుకోవాలి. వాటిని మెత్తగా అయ్యేంత వరకు ఉడకపెట్టాలి. అనంతరం వేడి నీటి నుంచి బయటకు తీసి వాటిపైన ఉన్న తొడుగును తీసేయాలి. ఆపై వాటిని గుజ్జుగుజ్జుగా అయ్యే వరకు కలపాలి. దానితో పాటే క్యారెట్ తురుమును కూడా తీసుకోవాలి.
- ఓ గిన్నె తీసుకోవాలి. దానిలో ఓట్స్తో పాటు పచ్చిమిర్చి పేస్ట్, అల్లం పేస్ట్, క్యారెట్ తరుము, బంగాళదుంప పేస్ట్, తగినంత ఉప్పు, కారం, గరం మసాలా వేయాలి. ముద్దగా ఉన్న పనీర్ను చిన్నగా నలిపి గిన్నెలో కలపాలి. ఇప్పుడు ఆ మిశ్రమాన్ని చేతితో బాగా కలపాలి. అప్పుడు మెత్తటి పిండిలాగా తయారు అవుతుంది.
- పిండిగా తయారైన దానిని చిన్న చిన్న ఉండలుగా విడదీసుకోవాలి. వాటిని రెండు చేతులతో చిన్నగా అదిమి కట్లెట్ ఆకారంలో ఫ్లాట్గా చేసుకోవాలి.
- గ్యాస్ మీద పెనం (ప్యాన్) పెట్టుకోవాలి. తక్కువ మంటతో వేడి చేయాలి. రెండు టీ స్పూన్ల నూనెను వేయాలి. కొంచెంసేపటి తరువాత కట్లెట్ను నూనెలో వేయాలి. దోరగా గోధుమ రంగులోకి వచ్చేంత వరకు వేయించాలి. అంతే వేడివేడి కట్లెట్ రెడీ.
ఇలా రెడీ అయిన ఓట్స్ కట్లెట్ను గ్రీన్ చట్నీ, టొమాటో కచప్తో తింటే అదిరిపోయే టేస్ట్ వస్తుంది. ఇంకెందుకు ఆలస్యం ఈ వర్షాకాలంలో వేడివేడి ఓట్స్ కట్లెట్ను తయారుచేసుకుని ఆస్వాదించండి .
ఇదీ చూడండి: ఈ దోసెలు ఎప్పుడైనా టేస్ట్ చేశారా?
