పాన్‌ ఇండియా స్టార్ ప్రభాస్- బాలీవుడ్ స్టార్ హీరోయిన్ దీపికా పదుకొణె జంటగా నటిస్తున్న భారీ బడ్జెట్‌ సైన్స్‌ ఫిక్షన్‌ చిత్రం ప్రాజెక్ట్ కె. బాలీవుడ్ బిగ్ బీ అమితాబ్‌ బచ్చన్‌ కీలకపాత్ర పోషిస్తున్నారు. దిశాపటానీ మరో కీ రోల్ పోషిస్తోంది. మహానటి ఫేమ్ డైరెక్టర్ నాగ్‌ అశ్విన్‌ దర్శకత్వం వహిస్తున్నారు.
అయితే ఈ సినిమా రిలీజ్ ఎప్పుడెప్పుడు ఉంటుందా? అని యావత్ సినీ ప్రపంచం ఎంతో ఆసక్తిగా ఎదురు చూస్తున్నారు. అలానే ఇది రెండు భాగాలుగా రూపొందబోతోందని కొద్ది రోజులుగా ప్రచారం సాగుతోంది. అయితే తాజాగా దీనిపై త్వరలోనే స్పష్టత వచ్చేలా కనిపిస్తోంది. శివరాత్రి తర్వాత విడుదల తేదీ ప్రకటించాలని మేకర్స్ అనుకుంటున్నారని తెలుస్తోంది. 2024 సంక్రాంతికి రిలీజ్ డేట్ ఫిక్స్ చేయాలని భావిస్తున్నారట. రిలీజ్ డేట్ రోజే ఈ సినిమా రెండు భాగాలా లేదా ఒక భాగమా అన్నది కూడా స్పష్టత వచ్చే అవకాశముందని సమాచారం.
ఇకపోతే ఈ మూవీని మూడో ప్రపంచ యుద్ధం నేపథ్యంలో రూపొందిస్తున్నారట. ఈ ప్రాజెక్ట్లో సుదీర్ఘమైన అయిదు యాక్షన్‌ బ్లాకులు ఉన్నట్లు సమాచారం. వీటిని తెరకెక్కించేందుకు నలుగురు హాలీవుడ్‌ యాక్షన్‌ డైరెక్టర్లను సిద్ధంగా ఉన్నారని గతంలో వార్తలు వచ్చాయి. మునుపెన్నడు చూడని భారీ దృశ్యరూప చిత్రంగా, అతిపెద్ద యాక్షన్‌ థ్రిల్లర్‌గా ఈ చిత్రాన్ని తెరకెక్కిస్తున్నారు.
ఇక ఈ చిత్రంలో కీ రోల్ పోషిస్తున్న అమితాబ్‌ పాత్రను ఇతిహాస ఆధారిత అశ్వత్థామ రోల్ ఇన్స్పిరేషన్తో తీస్తున్నారట. ప్రభాస్-బిగ్బీ మధ్య పూర్తిస్థాయి యాక్షన్‌ సన్నివేశాలను చూపించనున్నారని తెలిసింది. దీనికోసం నాగ్‌ అశ్విన్‌ ప్రత్యేకంగా రచిస్తున్నారట.
ఇదీ చూడండి: ఒక్క సాంగ్ కోసం 7 భారీ సెట్స్.. చైతూకు వర్కౌట్ అవుతుందా!
