కథానాయకుడు బాలకృష్ణ మాస్‌ ఎనర్జీని చూపిస్తామంటూ ఊరిస్తోంది 'వీరసింహారెడ్డి' బృందం. బాలయ్య హీరోగా నటిస్తున్న ఈ సినిమాని గోపీచంద్‌ మలినేని తెరకెక్కిస్తున్న సంగతి తెలిసిందే. మైత్రీ మూవీ మేకర్స్‌ సంస్థ నిర్మిస్తోంది. శ్రుతిహాసన్ కథానాయిక. ఈ చిత్రం సంక్రాంతి సందర్భంగా జనవరి 12న ప్రేక్షకుల ముందుకు రానుంది. ఈ నేపథ్యంలో ప్రచార కార్యక్రమాల జోరు పెంచుతోంది చిత్ర బృందం. ఇందులో భాగంగా ఈనెల 15న ఈ సినిమాలోని "సుగుణ సుందరి" అనే పాట విడుదల చేయనున్నారు.
ఈ విషయాన్ని చిత్రవర్గాలు ఆదివారం అధికారికంగా ప్రకటించాయి. ఈ మేరకు పాటకు సంబంధించిన కొత్త పోస్టర్‌ను సామాజిక మాధ్యమాల్లో పంచుకున్నారు. అందులో శ్రుతిహాసన్, బాలకృష్ణ స్టైలిష్‌ లుక్‌లో ఆకట్టుకునేలా కనిపించారు. మాస్‌ యాక్షన్‌ ఎంటర్‌టైనర్‌గా రూపొందుతోన్న చిత్రమిది. ఓ పాట మినహా ఇప్పటికే చిత్రీకరణ పూర్తయింది. నిర్మాణాంతర పనులు శరవేగంగా జరుగుతున్నాయి. తమన్‌ సంగీతమందిస్తున్నారు. రిషి పంజాబీ ఛాయాగ్రాహకుడిగా వ్యవహరిస్తున్నారు.
'ధమాకా'తో వినోదాలు పంచేందుకు సిద్ధమయ్యారు రవితేజ. ఆయన కథానాయకుడిగా నటించిన ఈ చిత్రాన్ని త్రినాథరావు నక్కిన తెరకెక్కించారు. టీజీ విశ్వప్రసాద్‌ నిర్మించారు. శ్రీలీల కథానాయిక. ఈ సినిమా ఈనెల 23న ప్రేక్షకుల ముందుకు రానుంది. ఈ నేపథ్యంలోనే ప్రచార పర్వాన్ని వేగవంతం చేసింది చిత్ర బృందం. ఇందులో భాగంగా ఈనెల 15న ట్రైలర్ విడుదల చేయనున్నారు. ఈ విషయాన్ని ఆదివారం అధికారికంగా ప్రకటించారు. ఈ మేరకు ఓ కొత్త పోస్టర్‌ను సామాజిక మాధ్యమాల్లో పంచుకున్నారు. ఆ ప్రచార చిత్రంలో రవితేజ సూట్‌ ధరించి.. కళ్లజోడుతో స్టైలిష్‌గా కనిపించారు. ఇందులో ఆయన ద్విపాత్రాభినయం చేస్తున్నారు. ఈ సినిమాకి ప్రసన్న కుమార్‌ బెజవాడ కథ, స్క్రీన్‌ప్లే, సంభాషణలు అందించారు. భీమ్స్‌ సిసిరోలియో సంగీత దర్శకుడు. కార్తీక్‌ ఘట్టమనేని ఛాయాగ్రాహకుడిగా వ్యవహరించారు.
