పోలీసు శాఖపై ప్రజల్లో ఉన్న అపనమ్మకాన్ని తొలగించడేమే లక్ష్యంగా ఓ కానిస్టేబుల్ తనవంతు కృషి చేస్తున్నారు. పోలీసులు చేస్తున్న కృషిపై పాటల రూపంలో ప్రచారం చేస్తున్నారు. మంచిర్యాల జిల్లా రామకృష్ణాపూర్కి చెందిన అన్నం వంశీకృష్ణ.. హైదరాబాద్ కమిషనరేట్లో ఏఆర్ కానిస్టేబుల్గా పనిచేస్తున్నారు. పీజీ పూర్తి చేసిన వంశీకృష్ణ.. ఉద్యోగంలో చేరకముందు తనకు పాటలపై ఉన్న అభిరుచి కారణంగా స్నేహితులతో కలిసి సినిమా పాటలు పాడేవారు. మరికొన్ని పాటలు తానే స్వయంగా రాసుకుని ఆలపించేవారు.
2020లో కానిస్టేబుల్ ఉద్యోగానికి ఎంపికైన వంశీకృష్ణ.. పోలీసులపై కొందరికి ఉన్న అపనమ్మకాన్ని పూర్తిగా తొలగించాలని అనుకున్నారు. అందుకు పాట రూపంలో చెబితే వింటారని భావించారు. దానికోసం బాలీవుడ్లో అక్షయ్ కుమార్ నటించిన కేసరి సినిమాలోని 'తేరి మిట్టి హే మిలుజావా..' అనే పాటను ఎంచుకున్నారు. ఆ పాటకు ఉన్న బాణీలను వాడుకుని సొంతంగా.. ఓ ధీరుడిలా... అంటూ తెలుగులో పోలీసులు చేస్తున్న సేవలను తెలియజేస్తూ పాటను రాశారు.
ఎస్ఆర్నగర్లోని తన స్నేహితుడి ధ్వని స్టూడియోస్ సహకారంతో పాటను వంశీకృష్ణ స్వయంగా పాడి య్యూట్యూబ్లో పెట్టారు. ఇప్పుడు ఈ పాట వైరల్గా మారింది. అంతే కాదు వంశీకృష్ణను ఉన్నతాధికారులు సైతం ప్రశంసిస్తున్నారు. ఈ పాటను మహిళా భద్రతా విభాగం డీఐజీ సుమతి తన ట్విట్టర్ ఖాతాలో పోస్ట్ చేశారు.
ఇదీ చదవండి: రాష్ట్రంలో కొత్తగా 909 కరోనా కేసులు నమోదు
