Kavitha Bail Petition Hearing Adjourned : దిల్లీ మద్యం కేసులో అరెస్టయి జైలు జీవితం అనుభవిస్తున్న బీఆర్ఎస్ ఎమ్మెల్సీ కవిత దిల్లీ హైకోర్టులో వేసిన పిటిషన్పై విచారణ వాయిదా పడింది. కవిత బెయిల్ పిటిషన్పై వాదనలకు ఈడీ సమయం కోరడంతో విచారణను మే 24వ తేదీకి దిల్లీ హైకోర్టు వాయిదా వేసింది. దిల్లీ మద్యం కేసులో రౌస్ అవెన్యూ ప్రత్యేక కోర్టు తీర్పుపై ఎమ్మెల్సీ కవిత హైకోర్టును ఆశ్రయించిన విషయం తెలిసిందే.
ఈడీ, సీబీఐ కేసుల్లో కవిత దాఖలు చేసిన పిటిషన్ను ఈ నెల 6వ తేదీన రౌస్ అవెన్యూ కోర్టు డిస్మిస్ చేసింది. దీంతో రౌస్ అవెన్యూ కోర్టు తుది ఉత్తర్వులను హైకోర్టులో కవిత సవాల్ చేశారు. ఈ క్రమంలోనే ఇవాళ జరగాల్సిన విచారణను ఈడీ సమయం కోరడంతో ధర్మాసనం వాయిదా వేసింది. దిల్లీ మద్యం విధానం మనీలాండరింగ్ కేసులో మార్చి 15వ తేదీన కవితను ఈడీ అరెస్టు చేసిన విషయం తెలిసిందే. ప్రస్తుతం ఆమె తీహార్ జైలులో జ్యుడీషియల్ కస్టడీలో ఉన్నారు.
కవిత జ్యుడీషియల్ కస్టడీ పొడిగింపు : మరోవైపు మే 7వ తేదీన ఎమ్మెల్సీ కవిత జ్యుడీషియల్ కస్టడీని మరో వారం రోజులు పొడిగిస్తూ రౌజ్ అవెన్యూ కోర్టు తెలిపింది. ఈ జ్యుడీషియల్ కస్టడీని పొడిగించాలన్ని దర్యాప్తు సంస్థల విజ్ఞప్తి మేరకు న్యాయస్థానం ఆమెకు మే 14వ తేదీ వరకు కస్టడీని పొడిగించింది. దీంతో ఆమె మే 14 వరకు తిహాడ్ జైలులోనే ఉండనున్నారు. వీడియో కాన్ఫరెన్స్ ద్వారా కాకుండా ప్రత్యక్షంగా కోర్టులో ప్రవేశపెట్టాలన్ని ఆమె అభ్యర్థన మేరకు కోర్టు అందుకు తగినట్లు ఆదేశాలు జారీ చేసింది. ఆమె నేరుగా తన వాదనలను వినిపించారు.
అసలేం జరిగింది : దిల్లీ మద్యం విధానాన్ని ఎమ్మెల్సీ కవితకు అనుకూలంగా మలుచుకోవడానికి వీలుగా ఆమ్ ఆద్మీ పార్టీ అగ్రనేతలకు ఆమె రూ.100 కోట్ల ముడుపులు చెల్లించారని దర్యాప్తు సంస్థలైన ఈడీ, సీబీఐ ప్రధాన ఆరోపణలు. ఈ నేపథ్యంలో మనీ లాండరింగ్ నిరోధక చట్టం కింద ఎమ్మెల్సీ కవితను మార్చి 15న ఈడీ అరెస్టు చేసింది. అలాగే ఏప్రిల్ 11న సీబీఐ అరెస్టు చేసింది. అప్పటి నుంచి ఆమె దిల్లీలోని తిహాడ్ జైలులో జ్యుడీషియల్ కస్టడీలో ఉన్నారు. ఈ కేసులో ఆమె కీలక పాత్రధారి అని బెయిల్ ఇవ్వొద్దని, ఒకవేళ ఇస్తే బయటకి వచ్చి సాక్షులు, సాక్ష్యాలను ప్రభావితం చేసే వీలుందని ఈడీ, ,సీబీఐ కోర్టును కోరుతోంది.
దిల్లీ లిక్కర్ కేసులో తెరపైకి మరోపేరు - కవిత అల్లుడి పాత్రపై ఈడీ ఆరా - Delhi liquor scam updates
'నా అరెస్టు చట్టవిరుద్ధం - రద్దు చేయండి' - సుప్రీంకోర్టులో కవిత రిట్ పిటిషన్
