మీల్​ మేకర్​ మంచూరియా - ఇలా చేస్తే టేస్ట్​ అదిరిపోద్ది! పిల్లలు అస్సలు వదిలిపెట్టరు!

Meal Maker Manchurian: సాయంత్రమైతే చాలు చాలా మందికి ఏదో ఒకటి తినాలని అనిపిస్తుంది. కొద్దిమంది ఫాస్ట్​ఫుడ్​ సెంటర్​లో లభించే మంచూరియాలను ఇష్టంగా తింటుంటారు. అయితే అలా బయట కొనకుండా ఇంట్లోనే ఒకసారి మీల్ మేకర్‌తో మంచూరియా చేసి చూడండి. రుచి అదిరిపోతుంది. మరి దానికి కావాల్సిన పదార్థాలు, తయారీ విధానం ఈ స్టోరీలో చూద్దాం..

Meal Maker Manchurian Making Process: మంచూరియా.. ఈ పేరు వింటే చాలు చాలా మందికి తినాలనిపిస్తుంది. వెజ్​ మంచూరియా, చికెన్​ మంచూరియా అంటూ బయట ఫాస్ట్​ఫుడ్​ సెంటర్లో లభించే వాటిని కొనుక్కోని తింటుంటారు. అయితే ఎప్పుడూ అవే కాకుండా ఇంట్లోనే ఒక్కసారి మీల్​ మేకర్​తో మంచూరియా ట్రై చేస్తే టేస్ట్​ అదిరిపోతుంది. మార్కెట్లో సోయా చంక్ పేరుతో మీల్ మేకర్ లభిస్తుంది. ఇక ఈ మీల్​మేకర్​ను బిర్యానీ, పలావుల్లో వేసి వండుతారు. వీటిని కూరగా కూడా వండుకుంటారు. ఈసారి మీరు మీల్ మేకర్ మంచూరియా రెసిపీ ట్రై చేయండి. టేస్ట్​ కూడా అదిరిపోతుంది. మరి దానికి కావాల్సిన పదార్థాలు, తయారీ విధానం ఈ స్టోరీలో చూద్దాం..

కావలసిన పదార్థాలు

• మీల్ మేకర్ - ఒక కప్పు
• ఉల్లిపాయల తరుగు - రెండు స్పూన్లు
• పచ్చిమిర్చి తరుగు - ఒక స్పూను
• కార్న్ ఫ్లోర్ - రెండు స్పూన్లు
• అల్లం తరుగు - ఒక స్పూను
• వెల్లుల్లి తరుగు - ఒక స్పూను
• గ్రీన్ చిల్లి సాస్ - ఒక స్పూను
• సోయా సాస్ - అర స్పూను
• టమాటా కెచప్ - ఒక స్పూను
• వెనిగర్ - అర స్పూను
• నీళ్లు - తగినన్ని
• మిరియాల పొడి - అర స్పూను
• స్ప్రింగ్ ఆనియన్స్ తరుగు - ఒక స్పూను
• ఉప్పు - రుచికి సరిపడా
• నూనె - డీప్ ఫ్రైకి సరిపడా

తయారీ విధానం:

• ముందుగా స్టవ్​ మీద గిన్నె పెట్టి అందులో కొన్ని నీళ్లు పోసుకోవాలి.
• నీళ్లు వేడెక్కాక మీల్​మేకర్​ను వేసి స్టవ్ ఆఫ్​ చేసి ఐదు నిమిషాలు పక్కకు పెట్టుకోవాలి.
• తర్వాత వాటిని చేత్తో తీసి పిండి వేరే గిన్నెలోకి తీసుకోవాలి.
• ఆ గిన్నెలోనే రుచికి సరిపడా ఉప్పు, కార్న్​ఫ్లోర్ కూడా వేసి కలపాలి. ఈ మీల్ మేకర్ మొత్తానికి కార్న్ ఫ్లోర్, ఉప్పు పట్టేలా చూడండి.
• ఇప్పుడు స్టవ్ మీద కళాయి పెట్టి డీప్ ఫ్రైకి సరిపడా నూనె పోసుకోవాలి.
• నూనె వేడెక్కాక మీల్​ మేకర్​లను వేసి డీప్ ఫ్రై చేసుకోవాలి.
• తర్వాత స్టవ్ మీద మరో కళాయి పెట్టి.. మంటను మీడియం ఫ్లేమ్​లో పెట్టి కళాయిలో మూడు స్పూన్ల నూనె వేయాలి.
• నూనె వేడెక్కాక పచ్చిమిర్చి తరుగు, అల్లం తరుగు, వెల్లులి తరుగు వేసి వేయించాలి.
• ఇప్పుడు మంటను సిమ్​లో పెట్టి చిల్లీ సాస్, సోయాసాస్, టమాటా కెచప్, వెనిగర్ వేసి వేయించాలి.
• మిరియాల పొడి కూడా వేసి కలుపుకోవాలి. కాస్త ఉప్పు కూడా చల్లుకోవాలి.
• అది గ్రేవీలా ఉన్నప్పుడు ముందుగా వేయించి పెట్టుకున్న మీల్ మేకర్‌లను అందులో వేసి బాగా కలుపుకోండి.
• పైన స్ప్రింగ్ ఆనియన్స్ చల్లుకోవాలి. అంతే మీల్ మేకర్​ మంచూరియా రెడీ.
• ఇది చాలా రుచిగా ఉంటుంది. పిల్లలు దీన్ని ఇష్టంగా తింటారు.

ఉపయోగాలు: మీల్ మేకర్ తినడం వల్ల ఎన్నో రకాలుగా ఉపయోగాలు ఉన్నాయి. సోయాతో చేసిన ఈ మీల్ మేకర్‌ను తినడం వల్ల మన శరీరానికి యాంటీ ఆక్సిడెంట్లు అందుతాయి. ఎన్నో రకాల క్యాన్సర్లు రాకుండా ఇది అడ్డుకుంటుంది. అలాగే ఈ మీల్ మేకర్లో అసంతృప్త కొవ్వులు అధికంగా ఉంటాయి. ఇవి కొలెస్ట్రాల్‌ను తగ్గిస్తాయి. దీనివల్ల గుండెకు మేలు జరుగుతుంది.