திருப்பத்தூர்: ஆம்பூர் அடுத்த செங்கிலிகுப்பம் ரயில்வே தண்டவாளம் அருகே வடமாநிலத்தைச் சேர்ந்த நபர் ஒருவர் இறந்து கிடப்பதாக ஜோலார்பேட்டை ரயில்வே காவல் துறையினருக்கு தகவல் கிடைத்து உள்ளது. இவ்வாறு கிடைத்த தகவலின் பேரில் சம்பவ இடத்திற்கு விரைந்த ரயில்வே காவல் துறையினர், உயிரிழந்தவரின் உடலை மீட்டு, பிரேத பரிசோதனைக்காக ஆம்பூர் அரசு மருத்துவமனைக்கு அனுப்பி வைத்தனர். மேலும், உயிரிழந்த நபர் குறித்து காவல் துறையினர் விசாரணை மேற்கொண்டனர்.
இந்த விசாரணையில், உயிரிழந்த நபர் அருணாச்சலப்பிரதேச மாநிலம் நான்சி பகுதியைச் சேர்ந்த பதம்பஹதூர் தப்பா என்பது தெரிய வந்து உள்ளது. அது மட்டுமல்லாமல், அவர் தனது மனைவி, மகன் மற்றும் உறவினர் ஒருவருடன் வேலைக்காக கேரளா செல்வதற்காக அசாம் மாநிலத்தில் இருந்து கன்னியாகுமரி வரை செல்லும் விவேக் விரைவு ரயிலில் முன்பதிவில்லா பெட்டியில் பயணம் செய்து கொண்டிருந்து உள்ளார்.
அப்போது எதிர்பாராத விதமாக ரயில் பெட்டியின் படிக்கட்டில் இருந்து பதம்பஹதூர் தவறி விழுந்து உயிரிழந்திருப்பது தெரிய வந்து உள்ளது. இதனையடுத்து, உயிரிழந்த பதம்பஹதூரின் உடலைக் கண்டு அவரது மனைவி மற்றும் மகன் அழுதனர். மேலும், இது குறித்து காவல் துறையினர் தீவிர விசாரணை மேற்கொண்டு வருகின்றனர்.
இதே போன்று வாணியம்பாடி ரயில் நிலையம் அருகே தண்டவாளத்தைக் கடக்க முயன்ற அடையாளம் தெரியாத நபர் மீது ரயில் மோதியதில் சம்பவ இடத்திலேயே அந்த நபர் உடல் சிதைந்து உயிரிழந்து உள்ளார். இதனைத் தொடர்ந்து உயிரிழந்தவரின் உடலை மீட்ட ஜோலார்பேட்டை ரயில்வே காவல் துறையினர், உடலை வாணியம்பாடி அரசு மருத்துவமனைக்கு அனுப்பி வைத்து உயிரிழந்த நபர் யார் என்பது குறித்து விசாரணை மேற்கொண்டு வருகின்றனர்.
இதையும் படிங்க: மது வாங்க சென்ற இளைஞருக்கு நேர்ந்த சோகம்.. மர்ம நபர்களால் வெட்டிக் கொல்லப்பட்ட கொடூரம்!
