நீலகிரி மாவட்டத்தில் ஆங்கிலேயர் ஆட்சிக் காலத்திலிருந்து நூற்றாண்டு பழமைவாய்ந்த மலை ரயில் இயக்கப்பட்டுவருகிறது. யுனெஸ்கோவால் பாரம்பரிய சின்னம் என்ற சிறப்பைப்பெற்றது இந்த மலை ரயில். ஊட்டி - குன்னூர், குன்னூர் - மேட்டுப்பாளையம் இடையே இயக்கப்படும் இந்த மலை ரயிலில் பயணம் செய்ய சுற்றுலாப் பயணிகள் அதிகம் ஆர்வம் காட்டிவருவது வழக்கமான ஒன்று.
இந்த மலை ரயிலை இயக்க தற்போது 7 'எக்ஸ்' கிளாஸ் இன்ஜின்கள் பயன்படுத்தப்பட்டுவருகிறது. சுவிட்சர்லாந்து நாட்டில் தயாரிக்கப்பட்ட இந்த இன்ஜின்கள் பராமரிப்பதற்கு இதுவரை மிகவும் பழமைவாய்ந்த கிரேன் பயன்படுத்தப்பட்டுவந்தது. பத்துக்கும் மேற்பட்ட ஊழியர்கள் இந்த கிரேன் மூலம் இன்ஜின்களை கழற்றி பராமரிப்பதில் சிரமம் இருந்தது.
இந்த நிலையில் தென்னக ரயில்வே சார்பில் மின்சாரம் மூலம் இயங்கும் 10 டன் அளவு கொண்ட 'ஜிப் கிரேன்' பொருத்தப்பட்டுள்ளது. இதனை தென்னக ரயில்வே முதன்மை மெக்கானிக் தலைமைப் பொறியாளர் இன்பரசு தொடங்கிவைத்தார். இதனை பயன்படுத்தும் வழிமுறைகள் குறித்து அலுவலர்கள், ரயில்வே பணிமனை ஊழியர்களுக்கு விளக்கம் அளித்தனர். மின்சாரம் மூலம் இயங்கும் இந்த 'ஜிப் கிரேன்' பொருத்தப்பட்டுள்ளதால் இன்ஜின்களை கழற்றி பராமரிப்பதிலிருந்த சிரமம் நீங்கியுள்ளதாக ரயில்வே ஊழியர்கள் மகிழ்ச்சி தெரிவித்தனர்.
இதையும் படிங்க: நிரம்பிய நிலையில் நீலகிரி அணைகள்: சுற்றுலாப் பயணிகள் உற்சாகம்!
