சிவகங்கை மாவட்டத்தைச் சேர்ந்த செந்தில்குமார் உயர் நீதிமன்ற மதுரைக் கிளையில் மனுவினைத் தாக்கல் செய்திருந்தார்.
அதில், "நான் தாழ்த்தப்பட்ட சமூகத்தைச் சேர்ந்தவன். எனது உறவினர் காண்டீபன் நவம்பர் 20ஆம் தேதி உயிரிழந்த நிலையில், அவரது உடலை அடக்கம் செய்வதற்காக அகரம் ஜோதிபுரம் பிரதான சாலை பொதுப்பாதை வழியாக எடுத்துச் செல்ல மற்ற சமூகத்தைச் சேர்ந்தவர்கள் எதிர்ப்பு தெரிவித்துள்ளனர்.
இதனால் உடலை மயானத்திற்கு எடுத்துச் செல்ல இயலாத நிலை உள்ளது. மணலூர் கிராமத்தில் தாழ்த்தப்பட்ட வகுப்பைச் சேர்ந்தவர்கள் பொதுப் பாதையை பயன்படுத்துவதில், முன்னாள் ஒன்றிய தலைவர் பாலசுப்பிரமணியன், கிழக்குத் தெரு முருகேசன், கீழத்தெருவில் மகாதேவன் ஆகியோர் பல்வேறு இடையூறுகளை ஏற்படுத்தி வருகின்றனர்.
இது தொடர்பாக நடவடிக்கை கோரி அலுவலர்களிடம் பலமுறை மனு அளித்தும் எவ்வித நடவடிக்கையும் இல்லை. ஆகவே, இறந்தவர் உடலை, மணலூர் கிராமத்தில் உள்ள பொது மயானத்திற்கு அகரம் ஜோதிபுரம் வழியாக எடுத்துச் செல்வதற்கு காவல்துறை பாதுகாப்பு வழங்கவும். நல்ல முறையில் உடல் தகனம் செய்யப்படுவதை உறுதிப்படுத்த காவல்துறையினருக்கும் உத்தரவிட வேண்டும்" என கூறியிருந்தார்.
இந்த வழக்கை விசாரித்த நீதிபதி இளந்திரையன், மானாமதுரை டிஎஸ்பி, திருப்புவனம் வட்டாட்சியர் ஆகியோர் சம்பவ இடத்திற்கு நேரில் சென்று ஆய்வு செய்து, இது தொடர்பாக அறிக்கை தாக்கல் செய்ய உத்தரவிட்டு வழக்கை நாளை ஒத்திவைத்தார்.
இதையும் படிங்க: 'மேலவளவு சம்பவத்தில் அநீதி இழைப்பது திமுகவும் அதிமுகவும் தான் ' - வழக்கறிஞர் ரத்தினம் குற்றச்சாட்டு!
