Banana Throwing Festival: திண்டுக்கல் மாவட்டம், வத்தலகுண்டு அருகே சேவுகம்பட்டி கிராமம் உள்ளது. இங்குள்ள 'சோலை மலை அழகர்' கோயிலில் ஒரு விநோதமான ருசிகரமான திருவிழா ஆண்டுதோறும் நடந்து வருகிறது. கோயில்களில் பொதுவாக, உள்ளங்கை அளவிற்கு பிரசாதமாக பொங்கலோ (அ) வேறு ஏதாவது உணவுப்பொருட்களையோ வழங்குவார்கள். அதிகப்படியாக பார்த்தேமேயானால், திருவிழாக்களின் போது அன்னதானம் அளிக்கப்படும். இத்தகைய நிலையில், தங்களின் வத்தலக்குண்டு அருகே ஒரு சுவை நிறைந்த சுவாரஸ்யமான விழா நடந்துள்ளது.
தங்களது தோட்டங்களில் விளைந்த வாழைப்பழங்களை 'சோலை மலை அழகர்' கோயிலுக்கு தங்களின் விருப்பத்தை நிறைவேற்றினால் நேர்த்திக்கடனாக வழங்குவதாக இங்குள்ள பக்தர்கள் வேண்டிக்கொள்கின்றனர். இவ்வாறு நிறைவேறிய தங்களது நேர்த்திக்கடனுக்காக 'சோலை மலை அழகர்' கோயில் திருவிழாவின் ஒருபகுதியாக இன்று (ஜன.18) அழகருக்கு காணிக்கையாக வழங்க வாழைப்பழத்தை மாட்டுவண்டி, வேன் போன்றவற்றில் கொண்டு வந்தனர். தொடர்ந்து கூடை கூடையாக 200-க்கும் மேற்பட்ட கூடைகளில் கொண்டுவந்த ஆயிரக்கணக்கான வாழைப்பழங்களை பக்தர்கள் சூறையாக வீசினர்.
இந்த 'வாழைப்பழம் சூறை திருவிழா'வில் இவ்வாறு வீசிய வாழைப்பழங்களை பிரசாதமாக பக்தர்கள், ஒருவருக்கொருவர் போட்டிப் போட்டுக்கொண்டு முண்டியடித்து பெற்றுகொண்டனர். முன்னதாக, 'சோலை மலை அழகர்' கோயிலுடன் இணைந்த 'லட்சுமியம்மாள்' சந்நிதி முன்பு இதற்கான சிறப்புப் பூஜைகள் செய்யபட்டன.
இந்த திருவிழாவில் சேவுகம்பட்டி, ஒட்டன்சத்திரம், திண்டுக்கல், மதுரை, திருப்பூர் உள்ளிட்ட பகுதிகளைச் சேர்ந்தவர்கள் பங்கேற்கின்றனர். சூறையிடப்படும் பழங்களை எடுத்து உண்பதால் உடலுக்கு நன்மை ஏற்பட்டு, வீட்டில் மகாலட்சுமி கடாட்சம் பொங்கும் என்பது அங்குள்ளவர்களின் நம்பிக்கையாக உள்ளது.
இதையும் படிங்க: Watch video: தருமபுரியில் கோலாகலமாக நடந்த சிக்கன் சாப்பிடும் போட்டி
