கோவை மாவட்டம் பொள்ளாச்சி அடுத்து உள்ள கிணத்துக்கடவு அடுத்துள்ள குருநல்லிபாளையம், தேவராயபுரம், கொல்லப்பட்டி, சின்ன நெகமம், குளத்துப்பாளையம் ஆகிய பகுதிகளில் ஊராட்சி துணைத் தலைவர் பதவிக்கு மறைமுகத் தேர்தல் நடந்தது.
இதில் குருநல்லிபாளையம் ஊராட்சியில், துணைத் தலைவராக நாகரத்தினம் தேர்வுசெய்யப்பட்டார். தேவராயபுரம் ஊராட்சியில், துணைத் தலைவராக திருப்பதி கிருஷ்ணன் தேர்ந்தெடுக்கப்பட்டார்.
கோலார்பட்டி, சின்ன நெகமம், குளத்துப்பாளையம் ஆகிய ஊராட்சிகளில் துணைத் தலைவர் பதவிகளுக்கு ஊராட்சி மன்ற உறுப்பினர்கள் சிலர் வராததால் மறைமுகத் தேர்தல் ஒத்திவைக்கப்பட்டது.
இதில் குளத்துப்பாளையம், குளத்துப்பாளைய புதூர் ஊராட்சியில் 2500 மக்கள் வசிக்கின்றனர். இதில் 1000 வாக்குகள் பதிவாகியிருப்பது குறிப்பிடத்தக்கது. இங்கு ஆறு வார்டு உறுப்பினர்கள் தேர்ந்தெடுக்கப்பட்டனர்.
குளத்துப்பாளையம் ஊராட்சி அலுவலகத்தில் மறைமுகத் தேர்தலில் மூன்று பேர் மட்டும் வாக்கு அளிக்க வந்ததால் மறைமுகத் தேர்தல் 30ஆம் தேதி தள்ளிவைக்கப்பட்டது. நேற்றும் மூன்று பேர் மட்டும் வாக்களிக்க வந்த நிலையில் துணைத் தலைவருக்கான மறைமுகத் தேர்தல் நிறுத்திவைக்கப்பட்டது.
இது குறித்து, ஊராட்சி மன்றத் தலைவர் கன்னிகா பரமேஸ்வரி கூறுகையில், "மூன்று வருடங்களுக்கு பிறகு ஊராட்சி மன்றத் தேர்தல் நடந்தது. இதில் வெற்றி பெற்றுள்ளேன். ஆனால் மறைமுக துணைத் தலைவர் தேர்தல் தள்ளிப்போவது கவலையளிக்கிறது. இதனால் மக்களின் அடிப்படை தேவைகளும் செய்யமுடியாமல் உள்ளது. இதனைக் கருத்தில்கொண்டு தேர்தல் ஆணையம் தக்க நடவடிக்கை எடுக்க வேண்டும். விரைவில் மறுதேர்தல் நடத்த வேண்டும்" எனறார்.
இதையும் படிங்க: பெண் வேட்பாளர் கையை கடித்த பாமக வேட்பாளர்!
