சென்னை: 2022ஆம் ஆண்டு ஜூன் மாதம் ராமநாதபுரம் மாவட்டம் தேவக்கோட்டையைச் சேர்ந்த கரிகாலன் முடியரசன், கமுதியைச் சேர்ந்த செல்வம் வழிவிட்டான், நாகர்கோவிலைச் சேர்ந்த அனிஷ் பீட்டர், சிவகங்கை மாவட்டம் திருப்பத்தூரைச் சேர்ந்த முத்துகருப்பன் உலகன், சுந்தரேசன் அம்மாசி, ராஜ்குமார் கணேசன், கருப்பையா மாயாண்டி, மதுரை மேலூரைச் சேர்ந்த கருப்பையா முனியாண்டி, கருப்பையா பிச்சன், பாண்டி அழகன், சேகர் சேவக மூர்த்தி, நடராஜன் அழகப்பன் மற்றும் தஞ்சாவூர் ஒரத்த நாட்டைச் சேர்ந்த துரைக்கண்ணு சின்னையன் ஆகியோர் தனியார் முகவர்கள் மூலமாக ஓமன் நாட்டிற்கு பல்வேறு வேலைகளுக்காகச் சென்றனர்.
ஆனால், ஓமன் நாட்டில் வேலைக்கு அழைத்தவர்கள் உறுதியளித்தபடி, வேலை, அதற்குரிய ஊதியம், போதுமான உணவு வழங்காமை மற்றும் தனி அறையில் அடைத்து வைத்து துன்புறுத்தப்படுவதாகத் தகவல் வெளியானது. இந்த நிலையில் ஓமன் நாட்டில் சிக்கித் தவிக்கும் 13 பேரையும் மீட்டு தமிழ்நாட்டிற்கு அழைத்து வர வேண்டும் என, ஓமன் நாட்டில் உள்ளவர்களின் பெற்றோர், தமிழ்நாடு அரசிடம் கோரிக்கை வைத்தனர்.
இதனை கவனத்தில் கொண்ட தமிழ்நாடு முதலமைச்சர் மு.க.ஸ்டாலின், அயலகத் தமிழர் நல ஆணையரகம் மூலம் மீட்டு வர உத்தரவிட்டார். இதனையடுத்து ஓமன் நாட்டில் உள்ள இந்திய தூதரக அதிகாரிகளுடன் பேசி 13 இளைஞர்களும் ஒரே நேரத்தில் மீட்கப்பட்டனர். பின்னர் தமிழ்நாடு அரசு அயலகத் தமிழர் நலத்துறை மூலமாக விமான டிக்கெட்டுகள் எடுக்கப்பட்டு, அதன் மூலம் அவர்கள் இந்தியாவுக்கு அழைத்து வரப்பட்டனர்.
தொடர்ந்து சென்னை விமான நிலையத்திற்கு வந்த 13 பேரை, அயலகத் தமிழர் நல ஆணையரக அதிகாரிகள் வரவேற்றனர். பின்னர் 13 பேரும் சென்னை விமான நிலையத்திலிருந்து தமிழ்நாடு அரசு ஏற்பாடு செய்த வேன் மூலம் அழைத்துச் செல்லப்பட்டனர். அப்போது ஓமன் நாட்டிலிருந்து மீட்டு அழைத்து வந்ததற்கு உதவிய தமிழ்நாடு அரசுக்கும், முதலமைச்சருக்கும் அவர்கள் நன்றி தெரிவித்தனர்.
இதையும் படிங்க: இந்தியாவில் போலி பாஸ்போர்ட் வாங்கி வெளிநாடு சென்ற பங்களாதேஷ் நபர் கைது!
