இங்கிலாந்தில் சுற்றுப்பயணம் மேற்கொண்டுள்ள ஆஸ்திரேலிய அணி மூன்று டி20, ஒருநாள் போட்டிகள் அடங்கிய தொடரில் விளையாடி வருகிறது. இவ்விரு அணிகளுக்கும் இடையிலான முதலாவது டி20 போட்டி நேற்று (செப்.04) சவுதாம்ப்டன் நகரில் நடைபெற்றது. இதில் முதலில் டாஸ் வென்ற ஆஸ்திரேலிய அணியின் கேப்டன் ஆரோன் ஃபின்ச் பந்துவீச்சைத் தேர்வு செய்தார்.
இதையடுத்து களமிறங்கிய இங்கிலாந்து அணிக்கு ஜோஸ் பட்லர் அதிரடி தொடக்கத்தைக் கொடுத்தார். இருப்பினும் நட்சத்திர வீரர் ஜானி பேர்ஸ்டோவ் எட்டு ரன்களில் ஆட்டமிழந்து ஏமாற்றமளித்தார். பின்னர் ஜோடி சேர்ந்த பட்லர் - மாலன் இணை சிறப்பாக விளையாடி அணியின் ஸ்கோரை உயர்த்தினர்.
தொடர்ந்து அதிரடியாக விளையாடி வந்த பட்லர், 46 ரன்கள் எடுத்திருந்த நிலையில் ஆட்டமிழந்து அரைசதம் அடிக்கும் வாய்ப்பைத் தவறவிட்டார். மறுமுனையில் சிறப்பாக விளையாடிய டேவிட் மாலன் அரைசதம் அடித்து அசத்தினார். இதன் மூலம் இங்கிலாந்து அணி 20 ஓவர்கள் முடிவில் ஏழு விக்கெட் இழப்பிற்கு 162 ரன்களை எடுத்தது. அந்த அணியில் அதிகபட்சமாக டேவிட் மாலன் 66 ரன்களையும், ஜோஸ் பட்லர் 44 ரன்களை எடுத்தனர்.
பின்னர் 163 ரன்கள் எடுத்தால் வெற்றி என்ற இலக்குடன் களமிறங்கிய ஆஸ்திரேலிய அணிக்கு கேப்டன் ஆரோன் ஃபின்ச், டேவிட் வார்னர் ஜோடி அற்புதமான தொடக்கத்தை தந்தது. இந்த ஜோடி, முதல் விக்கெட் இழப்பிற்கு 98 ரன்களை சேர்த்து அணியின் வெற்றி வாய்ப்பை உறுதிசெய்தது.
ஆனால் ஆர்ச்சர், ராஷீத் ஆகியோரின் அபார பந்துவீச்சில் ஆஸ்திரேலிய அணி வீரர்கள் அடுத்தடுத்து விக்கெட்டுகளை இழந்து தடுமாறினர். இதனால் ஆஸ்திரேலிய அணி 20 ஓவர் முடிவில் ஆறு விக்கெட்டுகளை இழந்து 160 ரன்களை மட்டுமே எடுத்தது.
இதன் மூலம் இங்கிலாந்து அணி இரண்டு ரன்கள் வித்தியாசத்தில் ஆஸ்திரேலியாவை வீழ்த்தி த்ரில் வெற்றி பெற்றது. இப்போட்டியில் சிறப்பாக விளையாடிய டேவிட் மாலன் ஆட்ட நாயகனாகத் தேர்வு செய்யப்பட்டார்.
இதையும் படிங்க:சிஎஸ்கே வீரர்களின் மூன்றாம் கட்ட பரிசோதனையிலும் கரோனா நெகட்டிவ்!
