கொல்கத்தா: பாஜக செய்தித் தொடர்பாளராக இருந்த நூபுர் சர்மா, நபிகள் நாயகம் குறித்து சர்ச்சைக்குரிய வகையில் கருத்து தெரிவித்திருந்தார். இதற்கு இஸ்லாமியர்கள் மட்டுமல்லாமல் பல்வேறு தரப்பினரும் கடும் கண்டனம் தெரிவித்தனர். இஸ்லாமிய நாடுகளிலும் கடும் எதிர்ப்பு கிளம்பியதையடுத்து, நூபுர் சர்மா பாஜகவிலிருந்து நீக்கப்பட்டார். அதேநேரம் அவரை கைது செய்ய வலியுறுத்தி டெல்லி, மேற்கு வங்கம் உள்ளிட்ட பல இடங்களில் இஸ்லாமியர்கள் போராட்டத்தில் ஈடுபட்டனர்.
கொல்கத்தாவில் ஆம்ஹெர்ஸ்ட் ஸ்ட்ரீட் மற்றும் நர்கெல்டங்கா காவல் நிலையங்களில் நூபுர் சர்மா மீது புகார் அளிக்கப்பட்டது. அதன் அடிப்படையில் விசாரணைக்கு ஆஜராகும்படி நூபுர் சர்மாவுக்கு போலீசார் சம்மன் அனுப்பினர். ஆனால் அவர் ஆஜராகவில்லை. மேலும், கொல்கத்தாவிற்கு வந்தால் தன் மீது தாக்குதல் நடத்தப்பட வாய்ப்புள்ளதாகவும், அதனால் நேரில் ஆஜராக 4 வாரங்கள் கால அவகாசம் வேண்டும் என்றும் நூபுர் சர்மா போலீசாருக்கு மின்னஞ்சல் அனுப்பியிருந்தார்.
இந்த நிலையில், நுபுர் சர்மாவுக்கு எதிராக கொல்கத்தா போலீசார் லுக்அவுட் நோட்டீஸ் வெளியிட்டுள்ளனர். நேரில் ஆஜராகும்படி ஆம்ஹெர்ஸ்ட் ஸ்ட்ரீட் மற்றும் நர்கெல்டங்கா காவல் நிலையங்களிலிருந்து பல முறை நோட்டீஸ் அனுப்பியும், அவர் ஆஜராகாததால் லுக் அவுட் நோட்டீஸ் விடப்பட்டுள்ளதாக போலீசார் தெரிவித்தனர்.
