ਲੁਧਿਆਣਾ: ਜਗਰਾਓ ਪੁਲਿਸ ਦੇ ਅਧੀਨ ਆਉਂਦੇ ਥਾਣਾ ਦਾਖਾ ਤੇ ਸੀਆਈਏ ਸਟਾਫ ਵਿਚ ਬਤੌਰ ਇੰਸਪੈਕਟਰ ਵਜੋਂ ਨੌਕਰੀ ਤੋਂ ਰਿਟਾਇਰਡ ਹੋਏ ਇੰਸਪੈਕਟਰ ਪ੍ਰੇਮ ਸਿੰਘ ਸਮੇਤ ਇਕ ਹੋਰ ਇੰਸਪੈਕਟਰ ਚਮਕੌਰ ਸਿੰਘ ਖਿਲਾਫ ਮਾਮਲਾ ਦਰਜ ਕੀਤਾ ਗਿਆ ਹੈ। ਮਿਲੀ ਜਾਣਕਾਰੀ ਮੁਤਾਬਿਕ ਉਨ੍ਹਾਂ ਖਿਲਾਫ ਇਹ ਮਾਮਲਾ ਲੁੱਟ ਦੀ ਐਸਯੂਵੀ ਜਾਅਲੀ ਨੰਬਰ ਪੇਲਟ ਲਗਾ ਕੇ ਵਰਤਣ ਦੇ ਮਾਮਲੇ ਵਿਚ ਕੀਤਾ ਗਿਆ ਹੈ। ਦੱਸ ਦਈਏ ਕਿ ਮਾਮਲੇ ਵਿੱਚ ਐਸਐਸਪੀ ਜਗਰਾਓ ਹਰਜੀਤ ਸਿੰਘ ਨੇ ਜਲਦੀ ਹੀ ਇਨ੍ਹਾਂ ਨੂੰ ਗ੍ਰਿਫਤਾਰ ਕਰਨ ਦੀ ਗੱਲ ਆਖੀ ਹੈ।
ਦਰਅਸਲ ਇਹ ਹੈ ਮਾਮਲਾ: ਦੱਸ ਦਈਏ ਕਿ ਸਾਲ 2017 ’ਚ ਜਦੋਂ ਲੁਧਿਆਣਾ ਫਿਰੋਜਪੁਰ ਰੋਡ ’ਤੇ ਇਕ ਵਪਾਰੀ ਕੋਲੋਂ ਫਾਰਚੂਨਰ ਕਾਰ ਲੁੱਟ ਲਈ ਗਈ ਸੀ ਅਤੇ ਪੁਲਿਸ ਨੇ ਇਹ ਕਾਰ 2019 ਵਿਚ ਬਰਾਮਦ ਕਰ ਲਈ ਸੀ, ਪਰ ਉਸ ਸਮੇਂ ਤੱਕ ਕਾਰ ਦੇ ਮਾਲਿਕ ਨੇ ਬੀਮਾ ਕੰਪਨੀ ਕੋਲੋਂ ਨਵੀਂ ਕਾਰ ਕਲੇਮ ਦੇ ਰੂਪ ਵਿਚ ਲੈ ਲਈ ਸੀ ਅਤੇ ਆਰਟੀਓ ਦਫਤਰ ਵਲੋਂ ਲੁੱਟੀ ਗਈ ਕਾਰ ਦਾ ਨੰਬਰ ਬਲਾਕ ਕਰਕੇ ਬੀਮਾ ਕੰਪਨੀ ਨੂੰ ਨਵੀਂ ਕਾਰ ਲਈ ਨੰਬਰ ਦੇ ਦਿੱਤਾ ਸੀ।
ਇਸੇ ਗੱਲ ਦਾ ਫਾਇਦਾ ਚੁੱਕਦੇ ਹੋਏ ਇੰਸਪੈਕਟਰ ਪ੍ਰੇਮ ਸਿੰਘ ਜੋ ਉਸ ਸਮੇਂ ਥਾਣਾ ਦਾਖਾ ਦਾ ਐਸਐਚਓ ਸੀ ਨੇ ਆਪਣੇ ਸਾਥੀ ਥਾਣੇਦਾਰ ਚਮਕੌਰ ਸਿੰਘ ਨਾਲ ਤੇ ਆਪਣੇ ਦੋਸਤ ਜਗਸੀਰ ਨਾਲ ਮਿਲਕੇ ਇਸ ਕਾਰ ਦਾ ਜਾਅਲੀ ਨੰਬਰ ਅਤੇ ਜਾਅਲੀ ਨੰਬਰ ਪਲੇਟ ਲਗਾ ਕੇ ਇਸਨੂੰ ਆਪਣੇ ਨਿੱਜੀ ਹਿੱਤਾਂ ਲਈ ਚਲਾਉਣਾ ਸ਼ੁਰੂ ਕਰ ਦਿੱਤਾ। ਪਰ ਦਾਖਾ ਦੇ ਇਕ ਵਿਅਕਤੀ ਰਵਿੰਦਰਪਾਲ ਗਰੋਵਰ ਨੇ ਇਸ ਮਾਮਲੇ ਦੀ ਸ਼ਿਕਾਇਤ ਪੁਲਿਸ ਨੂੰ ਦਿੱਤੀ ਅਤੇ ਹੁਣ ਤੱਕ ਇਸ ਮਾਮਲੇ ਦੀ ਪੜਤਾਲ ਹੀ ਚਲਦੀ ਰਹੀ।
ਜਲਦ ਹੋਵੇਗੀ ਉਕਤ ਮੁਲਜ਼ਮਾਂ ਦੀ ਗ੍ਰਿਫਤਾਰੀ: ਪੜਤਾਲ ਦੌਰਾਨ ਇਹ ਸਾਹਮਣੇ ਆਇਆ ਕਿ ਇਹ ਦੋਵੇਂ ਅਫ਼ਸਰ ਇੰਸਪੈਕਟਰ ਵਜੋਂ ਰਿਟਾਇਰਡ ਹੋ ਗਏ ਹਨ ਤੇ ਹੁਣ ਜਗਰਾਓਂ ਐਸਐਸਪੀ ਮੁਤਾਬਿਕ ਇਨ੍ਹਾਂ ਦੋਵਾਂ ’ਤੇ ਬਣਦਾ ਮਾਮਲਾ ਦਰਜ ਕਰ ਲਿਆ ਗਿਆ ਹੈ ਤੇ ਫਾਰਚੂਨਰ ਕਾਰ ਵੀ ਬਰਾਮਦ ਕਰ ਲਈ ਗਈ ਹੈ ਤੇ ਜਲਦੀ ਹੀ ਇਸ ਮਾਮਲੇ ਵਿਚ ਇੰਨਾ ਦੀ ਗ੍ਰਿਫਤਾਰੀ ਵੀ ਕੀਤੀ ਜਾਵੇਗੀ।
ਇਹ ਵੀ ਪੜੋ: ਹਾਈਕੋਰਟ ਨੇ ਪੰਜਾਬ ਸਰਕਾਰ ਉੱਤੇ ਲਗਾਇਆ 50 ਹਜ਼ਾਰ ਦਾ ਜੁਰਮਾਨਾ, ਇਹ ਹੈ ਮਾਮਲਾ
