ਬਰਨਾਲਾ: ਪੰਜਾਬ ਵਿੱਚ ਕਿਸਾਨਾਂ ਵੱਲੋਂ ਆਪਣੀਆਂ ਮੰਗਾਂ ਨੂੰ ਲੈ ਕੇ ਧਰਨੇ ਪ੍ਰਦਰਸ਼ਨ ਲਗਾਤਾਰ ਜਾਰੀ ਹਨ। ਇਸੇ ਤਹਿਤ ਹੀ ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਡਕੌਂਦਾ (Bharti Kisan Union Ekta Dakonda) ਵਲੋਂ ਬਰਨਾਲਾ ਜ਼ਿਲ੍ਹੇ ਦੇ ਮੋਗਾ ਰੋਡ ’ਤੇ ਕਸਬਾ ਪੱਖੋ ਕੈਂਚੀਆਂ (Pakho Kanchiyan toll plaza) ਨੇੜੇ ਟੋਲ ਪਲਾਜ਼ਾ ਨੂੰ ਚੁੱਕਵਾਉਣ ਲਈ ਲੱਗਿਆ ਪੱਕਾ ਮੋਰਚਾ 96ਵੇਂ ਦਿਨ ਵੀ ਜਾਰੀ ਰਿਹਾ। ਬਠਿੰਡਾ ਜ਼ਿਲ੍ਹੇ ਦੇ ਬਲਾਕ ਫ਼ੂਲ ਅਤੇ ਬਰਨਾਲਾ ਜ਼ਿਲ੍ਹੇ ਦੇ ਬਲਾਕ ਸ਼ਹਿਣਾ ਨਾਲ ਸਬੰਧੀ ਜੱਥੇਬੰਦੀ ਦੇ ਆਗੂ ਅਤੇ ਵਰਕਰ ਮੋਰਚੇ ਵਿੱਚ ਟੋਲ ਨੂੰ ਚੁੱਕਵਾਉਣ ਲਈ ਡਟੇ ਹੋਏ ਹਨ।
ਇਸ ਸਬੰਧੀ ਗੱਲਬਾਤ ਕਰਦਿਆਂ ਜੱਥੇਬੰਦੀ ਦੇ ਸੂਬਾ ਪ੍ਰਧਾਨ ਬੂਟਾ ਸਿੰਘ ਬੁਰਜ਼ਗਿੱਲ ਨੇ ਕਿਹਾ ਕਿ ਇਹ ਟੋਲ ਸਿਰਫ਼ ਕੌਮੀ ਹਾਈਵੇ ਲਈ ਹੀ ਮਨਜ਼ੂਰ ਹੈ। ਜਦਕਿ ਜਿਸ ਜਗ੍ਹਾ ਟੋਲ ਲਗਾਇਆ ਗਿਆ ਹੈ, ਉਹ ਜਗ੍ਹਾ ਕੌਮੀ ਅਤੇ ਸਟੇਟ ਹਾਈਵੇ ਦੀ ਸਾਂਝੀ ਸੜਕ ਹੈ। ਜਿਸ ਕਰਕੇ ਟੋਲ ਕੰਪਨੀ ਵਲੋਂ ਬਾਜਾਖ਼ਾਨਾ ਦੇ ਸਟੇਟ ਰੋਡ ਤੋਂ ਆਉਣ ਵਾਲੇ ਲੋਕਾਂ ਤੋਂ ਵੀ ਟੋਲ ਵਸੂਲਿਆ ਜਾ ਰਿਹਾ ਸੀ। ਜਦਕਿ ਇਸ ਰੋਡ ਦੀ ਹਾਲਤ ਬੇਹੱਦ ਖਸਤਾ ਹੈ।
ਉਹਨਾਂ ਕਿਹਾ ਕਿ ਇਸ ਟੋਲ ਸਬੰਧੀ ਬੀਤੇ ਦਿਨੀਂ ਸੰਯੁਕਤ ਕਿਸਾਨ ਮੋਰਚੇ ਦੀ ਮੁੱਖ ਮੰਤਰੀ ਭਗਵੰਤ ਮਾਨ ਨਾਲ ਹੋਈ ਮੀਟਿੰਗ ਵਿੱਚ ਵੀ ਮੁੱਦਾ ਚੁੱਕਿਆ ਸੀ ਅਤੇ ਸੀਐਮ ਮਾਨ ਨੇ ਇਸ ਮਸਲੇ ਦੇ ਹੱਲ ਦਾ ਭਰੋਸਾ ਦਿੱਤਾ ਸੀ। ਪਰ ਕਈ ਦਿਨ ਬੀਤਣ ਦੇ ਬਾਵਜੂਦ ਸੀਐਮ ਮਾਨ ਤੇ ਆਪ ਸਰਕਾਰ ਦਾ ਕੋਈ ਜਵਾਬ ਨਹੀਂ ਆਇਆ।
ਉਹਨਾਂ ਕਿਹਾ ਕਿ ਜੱਥੇਬੰਦੀ ਦੀ ਮੰਗ ਇਸ ਟੋਲ ਨੂੰ ਇਸ ਗਲਤ ਜਗ੍ਹਾ ਤੋਂ ਹਟਾ ਕੇ ਸਿਰਫ਼ ਬਰਨਾਲਾ-ਮੋਗਾ ਨੈਸ਼ਨਲ ਹਾਈਵੇ ’ਤੇ ਤਬਦੀਲ ਕਰਵਾਉਣਾ ਹੈ ਅਤੇ ਆਪਣੀ ਮੰਗ ਪੂਰੇ ਹੋਣ ਤੱਕ ਉਹ ਆਪਣਾ ਧਰਨਾ ਜਾਰੀ ਰੱਖਣਗੇ। ਇਸ ਮੌਕੇ ਜੱਥੇਬੰਦੀ ਆਗੂ ਦਰਸ਼ਨ ਸਿੰਘ ਰਾਏਸਰ, ਬਲਵੰਤ ਸਿੰਘ ਨੰਬਰਦਾਰ, ਦਰਸ਼ਨ ਸਿੰਘ ਮਹਿਤਾ ਤੋਂ ਇਲਾਵਾ ਵੱਡੀ ਗਿਣਤੀ ਵਿੱਚ ਕਿਸਾਨ ਹਾਜ਼ਰ ਸਨ।
ਇਹ ਵੀ ਪੜੋ:- ਨੂਰਪੁਰਬੇਦੀ ਅਗਜਨੀ ਕਾਂਡ ਦਾ ਸ਼ਿਕਾਰ ਦੁਕਾਨਦਾਰਾਂ ਨੂੰ ਰਾਹਤ ਕਮੇਟੀ ਵੱਲੋਂ ਪਹਿਲੀ ਕਿਸ਼ਤ ਕੀਤੀ ਜਾਰੀ
