ਮੁੰਬਈ: ਲਗਾਤਾਰ 9 ਕਾਰੋਬਾਰੀ ਦਿਨਾਂ ਤੱਕ ਤੇਜੀ ਰਹਿਣ ਦੇ ਬਾਅਦ ਸੋਮਵਾਰ ਨੂੰ ਘਰੇਲੂ ਸ਼ੇਅਰ ਬਾਜ਼ਾਰਾਂ ਦੇ ਦੋਵੇਂ ਪ੍ਰਮੁੱਖ ਸੂਚਕ ਭਾਰੀ ਵਿਕਰੀ ਦੇ ਦਬਾਅ ਵਿੱਚ ਟੁੱਟ ਗਏ। ਮੁੱਖ ਰੂਪ ਤੋਂ ਆਈ.ਟੀ, ਟੈਕਨਾਲੋਜੀ ਅਤੇ ਦੂਰਸੰਚਾਰ ਕੰਪਨੀਆਂ ਦੇ ਸ਼ੇਅਰਾਂ 'ਚ ਭਾਰੀ ਵਿਕਰੀ ਕਾਰਨ ਬੀ.ਐੱਸ.ਈ. ਦਾ ਸੈਂਸੈਕਸ 520 ਅੰਕ ਟੁੱਟ ਗਿਆ। ਭਾਰੀ ਵਿਕਰੀ ਕਾਰਨ ਇੰਫੋਸਿਸ ਦੇ ਸ਼ੇਅਰ ਨੌਂ ਫੀਸਦੀ ਤੋਂ ਜ਼ਿਆਦਾ ਡਿੱਗ ਗਏ। ਇਸ ਤੋਂ ਇਲਾਵਾ ਐਚਡੀਐਫਸੀ ਲਿਮਟਿਡ ਅਤੇ ਐਚਡੀਐਫਸੀ ਬੈਂਕ ਦੇ ਸ਼ੇਅਰਾਂ ਵਿੱਚ ਗਿਰਾਵਟ ਕਾਰਨ ਵੀ ਸੂਚਕਾਂਕ ਵਿੱਚ ਗਿਰਾਵਟ ਆਈ।
ਬੀਐੱਸਈ ਦਾ 30 ਸ਼ੇਅਰਾਂ ਵਾਲਾ ਬੈਂਚਮਾਰਕ ਇੰਡੈਕਸ ਸੈਂਸੈਕਸ 520.25 ਅੰਕ ਜਾਂ 0.86 ਫੀਸਦੀ ਡਿੱਗ ਕੇ 59,910.75 ਅੰਕ 'ਤੇ ਆ ਗਿਆ। ਕਾਰੋਬਾਰ ਦੌਰਾਨ ਇਕ ਸਮੇਂ ਇਹ 988.53 ਅੰਕ ਤੱਕ ਡਿੱਗ ਗਿਆ। ਇਸੇ ਤਰ੍ਹਾਂ ਨੈਸ਼ਨਲ ਸਟਾਕ ਐਕਸਚੇਂਜ ਦਾ ਸਟੈਂਡਰਡ ਇੰਡੈਕਸ ਨਿਫਟੀ ਵੀ 121.15 ਅੰਕ ਭਾਵ 0.68 ਫੀਸਦੀ ਡਿੱਗ ਕੇ 17,706.85 'ਤੇ ਆ ਗਿਆ। ਸੈਂਸੈਕਸ 'ਚ ਸ਼ਾਮਲ ਕੰਪਨੀਆਂ 'ਚ ਇੰਫੋਸਿਸ 'ਚ ਸਭ ਤੋਂ ਜ਼ਿਆਦਾ ਨੌ ਫੀਸਦੀ ਤੋਂ ਜ਼ਿਆਦਾ ਦੀ ਗਿਰਾਵਟ ਦਰਜ ਕੀਤੀ ਗਈ। ਚੌਥੀ ਤਿਮਾਹੀ 'ਚ ਉਮੀਦ ਤੋਂ ਘੱਟ ਸ਼ੁੱਧ ਲਾਭ ਦੇ ਕਾਰਨ ਇਨਫੋਸਿਸ 'ਤੇ ਨਿਵੇਸ਼ਕਾਂ ਦਾ ਭਰੋਸਾ ਟੁੱਟ ਗਿਆ ਹੈ। ਇਸ ਤੋਂ ਇਲਾਵਾ ਟੈੱਕ ਮਹਿੰਦਰਾ, ਐਚਸੀਐਲ ਟੈਕਨਾਲੋਜੀਜ਼, ਲਾਰਸਨ ਐਂਡ ਟੂਬਰੋ, ਐਨਟੀਪੀਸੀ, ਵਿਪਰੋ, ਐਚਡੀਐਫਸੀ, ਟੀਸੀਐਸ ਅਤੇ ਐਚਡੀਐਫਸੀ ਬੈਂਕ ਦੇ ਸ਼ੇਅਰਾਂ ਵਿੱਚ ਵੀ ਗਿਰਾਵਟ ਦਰਜ ਕੀਤੀ ਗਈ।
ਦੂਜੇ ਪਾਸੇ, ਨੇਸਲੇ, ਪਾਵਰਗ੍ਰਿਡ, ਸਟੇਟ ਬੈਂਕ ਆਫ ਇੰਡੀਆ, ਕੋਟਕ ਮਹਿੰਦਰਾ ਬੈਂਕ, ਇੰਡਸਇੰਡ ਬੈਂਕ ਅਤੇ ਅਲਟਰਾਟੈਕ ਨੇ ਲਾਭ ਦਰਜ ਕੀਤਾ। ਬੈਂਚਮਾਰਕ ਸੂਚਕਾਂਕ ਦੇ ਉਲਟ ਵਿਆਪਕ ਬਾਜ਼ਾਰ ਵਿੱਚ ਵਾਧੇ ਦੀ ਸਥਿਤੀ ਰਹੀ। BSE ਮਿਡਕੈਪ ਇੰਡੈਕਸ 'ਚ 0.56 ਫੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ ਹੈ, ਜਦਕਿ ਸਮਾਲਕੈਪ ਇੰਡੈਕਸ 'ਚ 0.13 ਫੀਸਦੀ ਦਾ ਸੁਧਾਰ ਦਰਜ ਕੀਤਾ ਗਿਆ ਹੈ। ਜਿਓਜੀਤ ਫਾਈਨੈਂਸ਼ੀਅਲ ਸਰਵਿਸਿਜ਼ ਦੇ ਖੋਜ ਮੁਖੀ ਵਿਨੋਦ ਨਾਇਰ ਨੇ ਕਿਹਾ ਕਿ ਤਿਮਾਹੀ ਨਤੀਜਿਆਂ ਦੀ ਮਾੜੀ ਸ਼ੁਰੂਆਤ ਅਤੇ ਵਿਸ਼ਵ ਪੱਧਰ 'ਤੇ 10 ਸਾਲ ਦੇ ਅਮਰੀਕੀ ਬਾਂਡ ਯੀਲਡ ਵਧਣ ਦਾ ਘਰੇਲੂ ਬਾਜ਼ਾਰਾਂ 'ਤੇ ਭਾਰ ਪਿਆ ਹੈ। ਉਨ੍ਹਾਂ ਕਿਹਾ ਕਿ ਆਉਣ ਵਾਲੇ ਦਿਨਾਂ ਵਿੱਚ ਵੀ ਆਈਟੀ ਅਤੇ ਬੈਂਕਾਂ ਦੇ ਨਤੀਜੇ ਹੀ ਬਾਜ਼ਾਰ ਦੀ ਦਿਸ਼ਾ ਤੈਅ ਕਰਨਗੇ।
ਰਿਲਾਇੰਸ ਸਕਿਓਰਿਟੀਜ਼ ਦੇ ਰਿਸਰਚ ਦੇ ਮੁਖੀ ਮਿਤੁਲ ਸ਼ਾਹ ਨੇ ਕਿਹਾ, "ਆਈਟੀ ਸਟਾਕਾਂ ਵਿੱਚ ਘਾਟੇ ਕਾਰਨ ਭਾਰਤੀ ਸ਼ੇਅਰ ਬਾਜ਼ਾਰ ਨੁਕਸਾਨ ਨਾਲ ਬੰਦ ਹੋਏ।" ਆਈਟੀ ਇੰਡੈਕਸ 4.77 ਫੀਸਦੀ ਅਤੇ ਟੈਕਨਾਲੋਜੀ ਇੰਡੈਕਸ 4.56 ਫੀਸਦੀ ਡਿੱਗੇ। ਏਸ਼ੀਆ ਦੇ ਹੋਰ ਬਾਜ਼ਾਰਾਂ 'ਚ ਦੱਖਣੀ ਕੋਰੀਆ ਦਾ ਕੋਸਪੀ, ਜਾਪਾਨ ਦਾ ਨਿੱਕੇਈ, ਚੀਨ ਦਾ ਸ਼ੰਘਾਈ ਕੰਪੋਜ਼ਿਟ ਅਤੇ ਹਾਂਗਕਾਂਗ ਦਾ ਹੈਂਗਸੇਂਗ ਇੰਡੈਕਸ ਤੇਜੀ ਨਾਲ ਬੰਦ ਹੋਇਆ। ਯੂਰਪ ਦੇ ਬਾਜ਼ਾਰ ਵੀ ਦੁਪਹਿਰ ਦੇ ਸੈਸ਼ਨ 'ਚ ਸਕਾਰਾਤਮਕ ਦਿਸ਼ਾ 'ਚ ਕਾਰੋਬਾਰ ਕਰ ਰਹੇ ਸਨ। ਪਿਛਲੇ ਕਾਰੋਬਾਰੀ ਦਿਨ ਸ਼ੁੱਕਰਵਾਰ ਨੂੰ ਅਮਰੀਕੀ ਬਾਜ਼ਾਰ ਗਿਰਾਵਟ ਦੇ ਨਾਲ ਬੰਦ ਹੋਏ ਸਨ। ਇਸ ਦੌਰਾਨ ਕੌਮਾਂਤਰੀ ਤੇਲ ਸਟੈਂਡਰਡ ਬ੍ਰੈਂਟ ਕਰੂਡ 0.31 ਫੀਸਦੀ ਦੀ ਗਿਰਾਵਟ ਨਾਲ 86.04 ਡਾਲਰ ਪ੍ਰਤੀ ਬੈਰਲ 'ਤੇ ਆ ਗਿਆ। ਸਟਾਕ ਐਕਸਚੇਂਜ ਦੇ ਅੰਕੜਿਆਂ ਦੇ ਅਨੁਸਾਰ, ਵਿਦੇਸ਼ੀ ਸੰਸਥਾਗਤ ਨਿਵੇਸ਼ਕਾਂ ਨੇ ਵੀਰਵਾਰ ਨੂੰ 221.85 ਕਰੋੜ ਰੁਪਏ ਦੇ ਸ਼ੇਅਰਾਂ ਦੀ ਸ਼ੁੱਧ ਖਰੀਦਦਾਰੀ ਕੀਤੀ। ਅੰਬੇਡਕਰ ਜਯੰਤੀ ਦੇ ਮੌਕੇ 'ਤੇ ਸ਼ੁੱਕਰਵਾਰ ਨੂੰ ਘਰੇਲੂ ਸ਼ੇਅਰ ਬਾਜ਼ਾਰ ਬੰਦ ਰਹੇ ਸੀ।
ਸੋਨੇ ਵਿੱਚ ਤੇਜੀ: ਸਪਾਟ ਬਾਜ਼ਾਰ 'ਚ ਮਜ਼ਬੂਤ ਮੰਗ ਕਾਰਨ ਸੱਟੇਬਾਜ਼ਾਂ ਨੇ ਨਵੀਂ ਸਥਿਤੀ ਬਣਾਈ। ਜਿਸ ਕਾਰਨ ਸੋਮਵਾਰ ਨੂੰ ਵਾਇਦਾ ਕਾਰੋਬਾਰ 'ਚ ਸੋਨਾ 208 ਰੁਪਏ ਵਧ ਕੇ 60,537 ਰੁਪਏ ਪ੍ਰਤੀ 10 ਗ੍ਰਾਮ 'ਤੇ ਪਹੁੰਚ ਗਿਆ। ਮਲਟੀ ਕਮੋਡਿਟੀ ਐਕਸਚੇਂਜ 'ਤੇ ਜੂਨ ਵਿਚ ਡਿਲੀਵਰੀ ਲਈ ਇਕਰਾਰਨਾਮਾ 208 ਰੁਪਏ ਜਾਂ 0.34 ਫੀਸਦੀ ਵਧ ਕੇ 60,537 ਰੁਪਏ ਪ੍ਰਤੀ 10 ਗ੍ਰਾਮ 'ਤੇ ਪਹੁੰਚ ਗਿਆ। ਇਸ ਵਿੱਚ 17,695 ਲਾਟ ਦਾ ਕਾਰੋਬਾਰ ਹੋਇਆ। ਬਾਜ਼ਾਰ ਵਿਸ਼ਲੇਸ਼ਕਾਂ ਨੇ ਕਿਹਾ ਕਿ ਗਲੋਬਲ ਬਾਜ਼ਾਰਾਂ 'ਚ ਮਜ਼ਬੂਤੀ ਦੇ ਰੁਖ ਨਾਲ ਸੋਨੇ ਦੇ ਫਿਊਚਰਜ਼ 'ਚ ਤੇਜੀ ਆਈ। ਗਲੋਬਲ ਪੱਧਰ 'ਤੇ ਨਿਊਯਾਰਕ 'ਚ ਸੋਨਾ 0.47 ਫੀਸਦੀ ਵਧ ਕੇ 2,025.20 ਡਾਲਰ ਪ੍ਰਤੀ ਔਂਸ 'ਤੇ ਪਹੁੰਚ ਗਿਆ।
ਇਹ ਵੀ ਪੜ੍ਹੋ: PwC India ਦੇ ਕਰਮਚਾਰੀਆਂ ਲਈ ਖੁਸ਼ਖਬਰੀ, ਕੰਪਨੀ PEF ਵਿੱਚ ਕਰੇਗੀ ₹600 ਕਰੋੜ ਦਾ ਨਿਵੇਸ਼
