ਨਵੀਂ ਦਿੱਲੀ : ਮੌਜੂਦਾ ਖੰਡ ਸੀਜ਼ਨ 'ਚ ਚੀਨੀ ਦਾ ਉਤਪਾਦਨ ਪਿਛਲੇ ਖੰਡ ਸੀਜ਼ਨ ਦੇ ਮੁਕਾਬਲੇ 13 ਫੀਸਦੀ ਵੱਧ ਰਹਿਣ ਦੀ ਉਮੀਦ ਹੈ। ਸੰਸ਼ੋਧਿਤ ਅਨੁਮਾਨਾਂ ਦੇ ਅਨੁਸਾਰ, ਈਥਾਨੌਲ ਉਤਪਾਦਨ ਲਈ 3.5 ਮਿਲੀਅਨ ਟਨ ਖੰਡ ਦੇ ਡਾਇਵਰਸ਼ਨ ਨੂੰ ਛੋਟ ਦੇਣ ਤੋਂ ਬਾਅਦ ਮੌਜੂਦਾ ਖੰਡ ਸੀਜ਼ਨ ਵਿੱਚ ਖੰਡ ਦਾ ਉਤਪਾਦਨ ਲਗਭਗ 350 ਲੱਖ ਟਨ ਹੋਣ ਦਾ ਅਨੁਮਾਨ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਉਤਪਾਦਨ 278 ਲੱਖ ਟਨ ਦੀ ਘਰੇਲੂ ਖਪਤ ਨੂੰ ਪੂਰਾ ਕਰਨ ਲਈ ਕਾਫੀ ਹੈ। ਮੌਜੂਦਾ ਖੰਡ ਸੀਜ਼ਨ (ਅਕਤੂਬਰ-ਸਤੰਬਰ 2022 ਦੀ ਮਿਆਦ) ਦੀ ਸ਼ੁਰੂਆਤ ਵਿੱਚ ਲਗਭਗ 85 ਲੱਖ ਟਨ ਦਾ ਕੈਰੀ ਓਵਰ ਸਟਾਕ ਸੀ।
ਸਰਕਾਰ ਨੇ ਕਿਹਾ ਕਿ ਦੇਸ਼ ਵਿੱਚ ਚੀਨੀ ਦੀ ਉਪਲਬਧਤਾ ਘਰੇਲੂ ਲੋੜ ਨੂੰ ਪੂਰਾ ਕਰਨ ਲਈ ਕਾਫੀ ਹੈ। ਅਜਿਹੇ 'ਚ ਖੰਡ ਦੀ ਉਪਲਬਧਤਾ ਪੂਰੀ ਹੋਵੇਗੀ ਅਤੇ ਘਰੇਲੂ ਬਾਜ਼ਾਰ 'ਚ ਖੰਡ ਦੀਆਂ ਕੀਮਤਾਂ ਵੀ ਸਥਿਰ ਰਹਿਣ ਦੀ ਉਮੀਦ ਹੈ।ਮੌਜੂਦਾ ਪਿੜਾਈ ਸੀਜ਼ਨ 'ਚ ਖੰਡ ਮਿੱਲਾਂ ਵੱਲੋਂ ਗੰਨਾ ਕਿਸਾਨਾਂ ਨੂੰ ਇਕ ਲੱਖ ਕਰੋੜ ਰੁਪਏ ਦਾ ਭੁਗਤਾਨ ਕਰਨ ਦੀ ਉਮੀਦ ਹੈ। ਸਰਕਾਰ ਖੰਡ ਮਿੱਲਾਂ ਨੂੰ ਵਾਧੂ ਗੰਨੇ ਨੂੰ ਪੈਟਰੋਲ ਨਾਲ ਮਿਲਾਏ ਗਏ ਈਥਾਨੌਲ ਵਿੱਚ ਬਦਲਣ ਲਈ ਉਤਸ਼ਾਹਿਤ ਕਰ ਰਹੀ ਹੈ, ਜੋ ਨਾ ਸਿਰਫ਼ ਹਰੇ ਬਾਲਣ ਵਜੋਂ ਕੰਮ ਕਰਦਾ ਹੈ ਸਗੋਂ ਕੱਚੇ ਤੇਲ ਦੀ ਦਰਾਮਦ ਕਾਰਨ ਵਿਦੇਸ਼ੀ ਮੁਦਰਾ ਦੀ ਬਚਤ ਵੀ ਕਰਦਾ ਹੈ।
ਈਥਾਨੋਲ ਮਿਸ਼ਰਣ : ਪਿਛਲੇ ਤਿੰਨ ਖੰਡ ਸੀਜ਼ਨ - 2018-19, 2019-20 ਅਤੇ 2020-21 ਵਿੱਚ ਲਗਭਗ 3.37 ਲੱਖ ਟਨ, 9.26 ਲੱਖ ਟਨ ਅਤੇ 22 ਲੱਖ ਟਨ ਖੰਡ ਨੂੰ ਈਥਾਨੌਲ ਵਿੱਚ ਬਦਲਿਆ ਗਿਆ ਹੈ। ਮੌਜੂਦਾ ਖੰਡ ਸੀਜ਼ਨ 2021-22 ਵਿੱਚ ਲਗਭਗ 3.5 ਮਿਲੀਅਨ ਟਨ ਖੰਡ ਨੂੰ ਮੋੜਨ ਦਾ ਅਨੁਮਾਨ ਹੈ। ਅਧਿਕਾਰੀਆਂ ਨੇ ਅਗਲੇ ਦੋ-ਤਿੰਨ ਸਾਲਾਂ ਵਿੱਚ ਲਗਭਗ 6 ਮਿਲੀਅਨ ਟਨ ਪ੍ਰਤੀ ਸਾਲ ਈਥਾਨੌਲ ਵੱਲ ਮੋੜਨ ਦਾ ਟੀਚਾ ਰੱਖਿਆ ਹੈ, ਜਿਸ ਨਾਲ ਵਾਧੂ ਗੰਨੇ ਦੀ ਸਮੱਸਿਆ ਦਾ ਹੱਲ ਹੋਵੇਗਾ ਅਤੇ ਗੰਨਾ ਕਿਸਾਨਾਂ ਨੂੰ ਸਮੇਂ ਸਿਰ ਭੁਗਤਾਨ ਕਰਨ ਵਿੱਚ ਮਦਦ ਮਿਲੇਗੀ।
ਆਮਦਨ ਦਾ ਸਰੋਤ : ਖੰਡ ਮਿੱਲਾਂ ਅਤੇ ਡਿਸਟਿਲਰੀਆਂ ਨੇ ਤੇਲ ਮਾਰਕੀਟਿੰਗ ਕੰਪਨੀਆਂ ਨੂੰ ਈਥਾਨੌਲ ਦੀ ਵਿਕਰੀ ਤੋਂ ਪਿਛਲੇ ਸੱਤ ਸਾਲਾਂ ਵਿੱਚ ਲਗਭਗ 53,000 ਕਰੋੜ ਰੁਪਏ ਦੀ ਕਮਾਈ ਕੀਤੀ ਹੈ। ਇਸ ਸਾਲ ਖੰਡ ਮਿੱਲਾਂ ਨੂੰ ਇੰਡੀਅਨ ਆਇਲ ਅਤੇ ਬੀਪੀਸੀਐਲ ਵਰਗੀਆਂ ਤੇਲ ਮਾਰਕੀਟਿੰਗ ਕੰਪਨੀਆਂ ਨੂੰ ਈਥਾਨੌਲ ਦੀ ਵਿਕਰੀ ਤੋਂ 18,000 ਕਰੋੜ ਰੁਪਏ ਤੋਂ ਵੱਧ ਦੀ ਕਮਾਈ ਹੋਣ ਦੀ ਉਮੀਦ ਹੈ। ਭਾਰਤ ਸਰਕਾਰ ਨੇ ਆਯਾਤ ਕੀਤੇ ਤੇਲ 'ਤੇ ਨਿਰਭਰਤਾ ਘਟਾਉਣ ਅਤੇ ਵਾਤਾਵਰਣ ਨੂੰ ਬਚਾਉਣ ਅਤੇ ਕਿਸਾਨਾਂ ਦੀ ਆਮਦਨ ਦੁੱਗਣੀ ਕਰਨ ਲਈ ਈਥਾਨੌਲ ਬਲੇਡਿੰਗ ਨੂੰ ਜ਼ਰੂਰੀ ਕਰ ਦਿੱਤਾ ਹੈ।
ਗੰਨਾ ਬਕਾਇਆ : ਪਿਛਲੇ ਖੰਡ ਸੀਜ਼ਨ ਵਿੱਚ, ਖੰਡ ਮਿੱਲਾਂ ਇਸ ਸਾਲ 18 ਅਪ੍ਰੈਲ ਤੱਕ ਕਿਸਾਨਾਂ ਦੇ 99.5% ਗੰਨੇ ਦੇ ਬਕਾਏ ਦਾ ਭੁਗਤਾਨ ਕਰਨ ਵਿੱਚ ਸਮਰੱਥ ਸਨ, ਕਿਉਂਕਿ ਉਨ੍ਹਾਂ ਨੇ 92,938 ਕਰੋੜ ਰੁਪਏ ਦੇ ਗੰਨੇ ਦੇ ਬਕਾਏ ਦੇ ਮੁਕਾਬਲੇ ਲਗਭਗ 92,480 ਕਰੋੜ ਰੁਪਏ ਦਾ ਭੁਗਤਾਨ ਕੀਤਾ ਸੀ। ਮੌਜੂਦਾ ਸੀਜ਼ਨ ਵਿੱਚ, ਖੰਡ ਮਿੱਲਾਂ ਨੇ ਹੁਣ ਤੱਕ 91,468 ਕਰੋੜ ਰੁਪਏ ਦੇ ਕੁੱਲ ਬਕਾਏ ਦੇ ਮੁਕਾਬਲੇ 80% ਤੋਂ ਵੱਧ ਗੰਨੇ ਦੇ ਬਕਾਏ ਕਲੀਅਰ ਕੀਤੇ ਹਨ। ਅਧਿਕਾਰਤ ਅਨੁਮਾਨਾਂ ਮੁਤਾਬਕ ਖੰਡ ਮਿੱਲਾਂ ਵੱਲੋਂ ਇਸ ਸਾਲ ਗੰਨਾ ਕਿਸਾਨਾਂ ਨੂੰ 1 ਲੱਖ ਕਰੋੜ ਰੁਪਏ ਦਾ ਭੁਗਤਾਨ ਕਰਨ ਦੀ ਸੰਭਾਵਨਾ ਹੈ।
ਇਹ ਵੀ ਪੜ੍ਹੋ : IMF ਨੇ 2022 ਲਈ ਭਾਰਤ ਦੇ ਵਿਕਾਸ ਦੀਆਂ ਸੰਭਾਵਨਾਵਾਂ ਵਿੱਚ ਕੀਤੀ ਕਟੌਤੀ
