ਨਵੀਂ ਦਿੱਲੀ: ਭਾਰਤੀ ਟੀਮ ਦੇ ਸਾਬਕਾ ਕਪਤਾਨ ਸੁਨੀਲ ਗਾਵਸਕਰ (Sunil Gavaskar) ਦੀ ਮਾਂ ਦਾ ਦਿਹਾਂਤ ਹੋ ਗਿਆ ਹੈ। ਸੁਨੀਲ ਗਾਵਸਕਰ ਦੀ ਮਾਂ ਮੀਨਲ ਗਾਵਸਕਰ (Meenal Gavaskar) ਆਪਣੇ ਮੁੰਬਈ ਸਥਿਤ ਘਰ 'ਤੇ ਰਹਿ ਰਹੀ ਸੀ। ਉਹ 95 ਸਾਲਾਂ ਦੇ ਸਨ। ਐਤਵਾਰ ਨੂੰ ਜਦੋਂ ਸੁਨੀਲ ਗਾਵਸਕਰ ਭਾਰਤ ਅਤੇ ਬੰਗਲਾਦੇਸ਼ (India vs Bangladesh) ਵਿਚਾਲੇ ਖੇਡੇ ਜਾ ਰਹੇ ਦੂਜੇ ਟੈਸਟ ਮੈਚ ਦੀ ਕੁਮੈਂਟਰੀ ਕਰ ਰਹੇ ਸਨ ਤਾਂ ਉਨ੍ਹਾਂ ਦੀ ਮਾਂ ਮੀਨਲ ਗਾਵਸਕਰ ਦੇ ਦੇਹਾਂਤ ਦੀ ਖਬਰ ਆਈ।ਅੱਜ ਸ਼ਿਵਾਜੀ ਪਾਰਕ ਵਿੱਚ ਉਨ੍ਹਾਂ ਦਾ ਅੰਤਿਮ ਸੰਸਕਾਰ ਕਰ ਦਿੱਤਾ ਗਿਆ।
ਸੁਨੀਲ ਗਾਵਸਕਰ ਦੇ ਪਿਤਾ ਮਨੋਹਰ ਗਾਵਸਕਰ ਦੀ 2012 ਵਿੱਚ ਬੇਂਗਲੁਰੂ ਵਿੱਚ ਆਪਣੀ ਭੈਣ ਦੇ ਘਰ ਮੌਤ ਹੋ ਗਈ ਸੀ। ਜਦੋਂ ਸੁਨੀਲ ਗਾਵਸਕਰ ਬੰਗਲਾਦੇਸ਼ ਦੇ ਖਿਲਾਫ ਭਾਰਤ ਦੇ ਟੈਸਟ ਮੈਚ ਵਿੱਚ ਕੁਮੈਂਟਰੀ ਕਰ ਰਹੇ ਸਨ, ਉਸ ਦੌਰਾਨ ਭਾਰਤ ਨੂੰ ਹਾਰ ਦਾ ਖ਼ਤਰਾ ਸੀ। ਸ਼੍ਰੇਅਸ ਅਈਅਰ ਅਤੇ ਰਵੀਚੰਦਰਨ ਅਸ਼ਵਿਨ ਨੇ ਸਥਿਤੀ ਨੂੰ ਸੰਭਾਲਿਆ ਅਤੇ ਅੱਠਵੇਂ ਵਿਕਟ ਲਈ 71 ਦੌੜਾਂ ਦੀ ਅਜੇਤੂ ਸਾਂਝੇਦਾਰੀ ਕਰਕੇ ਭਾਰਤ ਨੂੰ ਤਿੰਨ ਵਿਕਟਾਂ ਨਾਲ ਰੋਮਾਂਚਕ ਜਿੱਤ ਦਿਵਾਈ।
145 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦੇ ਹੋਏ ਭਾਰਤ ਨੇ ਐਤਵਾਰ ਨੂੰ ਮੈਚ ਦੇ ਚੌਥੇ ਦਿਨ ਤਿੰਨ ਵਿਕਟਾਂ ਤੇਜ਼ੀ ਨਾਲ ਗੁਆ ਦਿੱਤੀਆਂ, ਜਿਸ ਕਾਰਨ ਸਕੋਰ ਸੱਤ ਵਿਕਟਾਂ 'ਤੇ 74 ਦੌੜਾਂ ਹੋ ਗਿਆ। ਅਈਅਰ (46 ਗੇਂਦਾਂ 'ਤੇ ਅਜੇਤੂ 29 ਦੌੜਾਂ) ਅਤੇ ਅਸ਼ਵਿਨ (66 ਗੇਂਦਾਂ 'ਤੇ ਅਜੇਤੂ 42 ਦੌੜਾਂ) ਨੇ ਸਾਵਧਾਨੀ ਨਾਲ ਖੇਡਦੇ ਹੋਏ 105 ਗੇਂਦਾਂ 'ਤੇ 71 ਦੌੜਾਂ ਦੀ ਸਾਂਝੇਦਾਰੀ ਕੀਤੀ। ਦੋਵਾਂ ਨੇ ਮੈਚ ਬੰਗਲਾਦੇਸ਼ ਦੇ ਹੱਥੋਂ ਖੋਹ ਲਿਆ।
73 ਸਾਲਾ ਗਾਵਸਕਰ ਨੇ ਭਾਰਤ ਲਈ 125 ਟੈਸਟ ਮੈਚਾਂ ਵਿੱਚ 51.12 ਦੀ ਔਸਤ ਨਾਲ 10122 ਦੌੜਾਂ ਬਣਾਈਆਂ ਹਨ। ਉਹ ਟੈਸਟ ਕ੍ਰਿਕਟ ਵਿੱਚ 10,000 ਜਾਂ ਇਸ ਤੋਂ ਵੱਧ ਦੌੜਾਂ ਬਣਾਉਣ ਵਾਲਾ ਵਿਸ਼ਵ ਦਾ ਪਹਿਲਾ ਬੱਲੇਬਾਜ਼ ਬਣਿਆ। ਗਾਵਸਕਰ ਨੇ ਆਪਣੇ ਟੈਸਟ ਕਰੀਅਰ ਵਿੱਚ 34 ਸੈਂਕੜੇ ਲਗਾਏ ਹਨ, ਜਿਨ੍ਹਾਂ ਵਿੱਚੋਂ ਚਾਰ ਦੋਹਰੇ ਸੈਂਕੜੇ ਵਿੱਚ ਬਦਲ ਗਏ ਹਨ। ਇਸ ਤੋਂ ਇਲਾਵਾ ਉਸ ਨੇ 45 ਅਰਧ ਸੈਂਕੜੇ ਵੀ ਲਗਾਏ ਹਨ। ਗਾਵਸਕਰ ਨੇ ਭਾਰਤ ਲਈ 108 ਵਨਡੇ ਵੀ ਖੇਡੇ ਹਨ ਅਤੇ 1983 ਵਿਸ਼ਵ ਕੱਪ ਜੇਤੂ ਟੀਮ ਦਾ ਹਿੱਸਾ ਸਨ। ਗਾਵਸਕਰ ਨੇ ਵਨਡੇ 'ਚ 35.14 ਦੀ ਔਸਤ ਨਾਲ 3092 ਦੌੜਾਂ ਬਣਾਈਆਂ ਹਨ। ਇਸ ਦੌਰਾਨ ਉਨ੍ਹਾਂ ਨੇ 1 ਸੈਂਕੜਾ ਅਤੇ 27 ਅਰਧ ਸੈਂਕੜੇ ਲਗਾਏ ਹਨ।
ਇਹ ਵੀ ਪੜ੍ਹੋ: ਗਯਾ 'ਚ ਕੋਰੋਨਾ ਧਮਾਕਾ, ਚਾਰ ਵਿਦੇਸ਼ੀ ਮਿਲੇ ਪਾਜ਼ੀਟਿਵ, 29 ਦਸੰਬਰ ਤੋਂ ਦਲਾਈ ਲਾਮਾ ਦਾ ਸਮਾਗਮ
