ସମ୍ବଲପୁର: ଚାଷୀଙ୍କ ସମସ୍ୟାର ସମାଧାନ ପାଇଁ ପଶ୍ଚିମ ଓଡ଼ିଶାରେ ବିଜେପିର ଚକା ଜାମ ଆନ୍ଦୋଳନ। ଚାଷୀଙ୍କ ଧାନ ବିକ୍ରି ଜନିତ ସନସ୍ୟାର ସମାଧାନ ପାଇଁ ଆଜି(ଶନିବାର) ପଶ୍ଚିମ ଓଡିଶାର 12 ଜିଲ୍ଲାର 5ଟି ଲୋକସଭା ନିର୍ବାଚନ ମଣ୍ଡଳୀ ଓ 37 ଟି ବିଧାନସଭା ନିର୍ବାଚନ ମଣ୍ଡଳୀରେ ଥିବା ଜାତୀୟ ରାଜପଥ ଓ ରାଜ୍ୟ ରାଜପଥକୁ ବିଜେପି ତରଫରୁ 3 ଘଣ୍ଟା ପାଇଁ ଅବରୋଧ କରାଯାଇଛି।
ସକାଳ 10 ଟାରୁ ଅପରାହ୍ନ 1ଟା ପର୍ଯ୍ୟନ୍ତ ଚାଷୀଙ୍କ ସମସ୍ୟା ପାଇଁ ଆନ୍ଦୋଳନକୁ ଓହ୍ଲାଇଛି ବିଜେପି । ସମ୍ବଲପୁର ଜିଲ୍ଲାର ଆଇଁଠାପାଲି ଛକ, ରମେଡ ଛକ, ସିନ୍ଦୁରପଙ୍କ ଛକ,କୁଚିଣ୍ଡା, ଜମେନକିରା ଛକ, ବାମରା ଆଦି ଛକରେ ବିଜେପି ରାଜରାସ୍ତା ଅବରୋଧ କରିଛି। ଏହାର ପ୍ରଭାବରେ ରାସ୍ତାରେ ହଜାର ହଜାର ଗାଡି ଅଟକି ରହିଛି ।
ରାଜ୍ୟ ସରକାରଙ୍କ ତ୍ରୁଟିପୂର୍ଣ୍ଣ ଧାନ କ୍ରୟ ନୀତି ଯୋଗୁଁ ଚାଷୀଙ୍କ ଲକ୍ଷ ଲକ୍ଷ ବସ୍ତା ଧାନ ବିକ୍ରି ହୋଇନପାରି ମଣ୍ଡିରେ ପଡି ରହିଛି । ମୁଖ୍ୟତଃ ଟୋକାନ ବ୍ୟବସ୍ଥାରେ ଥିବା ଅବ୍ୟବସ୍ଥା, ଟୋକାନ ଲେପସ ହେବା ଆଦି ସମସ୍ୟାର ସମାଧାନ ପାଇଁ ବିଜେପି ଆନ୍ଦୋଳନକୁ ଓହ୍ଲାଇଛି।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
