ସମ୍ବଲପୁର: ସରକାରଙ୍କ ଟୋକନ ବ୍ୟବସ୍ଥାକୁ ନେଇ ସମ୍ବଲପୁର ଜିଲ୍ଲାରେ ପୁଣି ଦେଖାଦେଇଛି ଚାଷୀ ଅସନ୍ତୋଷ । ଧାନ ସଂଗ୍ରହ ପ୍ରକ୍ରିୟାରେ ଟୋକନ ବ୍ୟବସ୍ଥା ଯୋଗୁ ଚାଷୀଙ୍କୁ ନାନା ସମସ୍ୟାରେ ସମ୍ମୁଖୀନ ହେବାକୁ ପଡୁଛି । ଯାହାକୁ ବିରୋଧ କରି ସୋମବାର ସମ୍ବଲପୁର ଚାଷୀ ସିଏସଓ ଅଫିସ ଘେରିଥିଲେ ।
ସୂଚନାଯୋଗ୍ୟ, ଗତ ମାସ 21 ତାରିଖରେ ଚାଷୀମାନେ ରାଜରାସ୍ତାରେ ଆନ୍ଦୋଳନ କରିଥିଲେ । ସେ ସମୟରେ ମନ୍ତ୍ରୀ ସୁଶାନ୍ତ ସିଂ ଚାଷୀଙ୍କୁ ଟୋକନ ବ୍ୟବସ୍ଥାରେ ହେଉଥିବା ସମସ୍ୟା ଦୂର କରିବାର ପ୍ରତିଶ୍ରୁତି ଦେବା ପରେ ଆନ୍ଦୋଳନରୁ ଓହରିଥିଲେ ଚାଷୀ । କିନ୍ତୁ ବର୍ତ୍ତମାନ ସ୍ଥିତି ଯଥା ପୂର୍ବଂ ତଥା ପରଂ । ଟୋକନ ବ୍ୟବସ୍ଥା ଯୋଗୁଁ ଏବେ ମଧ୍ୟ ବହୁ ଚାଷୀ ଧାନ ବିକ୍ରି କରି ପାରୁନଥିବା ଅଭିଯୋଗ ହୋଇଛି । ବହୁ ସଂଖ୍ୟକ ଚାଷୀ ପଞ୍ଜୀକୃତ ହୋଇପାରୁନଥିବା ବେଳେ ଅନଲାଇନ ସମସ୍ୟା ଯୋଗୁଁ ବହୁ ଚାଷୀ ଟୋକନ ପାଇ ପାରୁନାହାନ୍ତି । ଫଳରେ ସମ୍ବଲପୁର ଓ କୁଚିଣ୍ଡା ଅଞ୍ଚଳରେ ବହୁ ଚାଷୀ ଧାନ ବିକ୍ରି କରିବାରୁ ବଞ୍ଚିତ ହେଉଥିବା ଅଭିଯୋଗ କରିଛନ୍ତି । ଏହି ଅଭିଯୋଗରେ ସୋମବାର ଚାଷୀ ମାନେ ସିଏସଓ କାର୍ଯ୍ୟାଳୟ ଘେରାଉ କରି ଧାରଣାରେ ବସିଥିଲେ ।
ଏହାସହ ସିଏସଓଙ୍କ ବାହାରକୁ ଡକାଇ ତାଙ୍କ ଉପରେ ବର୍ଷିଥିଲେ । ତେବେ ଘଟଣାସ୍ଥଳରେ ପୋଲିସର ଉପସ୍ଥିତି ସତ୍ତ୍ବେ ପ୍ରବଳ ଉତ୍ତେଜନା ପ୍ରକାଶ ପାଇଥିଲା । ଯଦି ଧାନ କ୍ରୟ ପ୍ରକ୍ରିୟାରେ ସୁଧାର ନଆସିଲେ ଆଗକୁ ଆନ୍ଦୋଳନ ଭୟଙ୍କର ରୁପ ନେବ ବୋଲି ଚାଷୀ କହିଛନ୍ତି । ପରେ ଘଟଣାସ୍ଥଳରେ ସମ୍ବଲପୁର ଉପଜିଲ୍ଲାପାଳ ପହଞ୍ଚି ଚାଷୀଙ୍କୁ ବୁଝାସୁଝା କରିବା ପରେ ଚାଷୀ ଆନ୍ଦୋଳନରୁ ଓହରିଥିଲେ ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
