ନବରଙ୍ଗପୁର: ପୁଣି ନବରଙ୍ଗପୁର ଟାଉନ ପୋଲିସକୁ ମିଳିଛି ଆଉ ଏକ ବଡ଼ ସଫଳତା । ଗୋଟିଏ ଟ୍ରକ ସହ ଲକ୍ଷାଧିକ ଟଙ୍କାର ଗଞ୍ଜେଇ ଜବତ କରିବା ସହ ଏଥିରେ ସମ୍ପୃକ୍ତ 2 ଜଣକୁ ଅଟକ ରଖିଛି ପୋଲିସ ।
ତେବେ ନବରଙ୍ଗପୁର ଜିଲ୍ଲାରେ ଗଞ୍ଜେଇ ଚୋରା ଚାଲାଣ ଥମିବାର ନା ନେଉନାହିଁ । ଲଗାତାର ଭାବେ କୋରାପୁଟ ଆଉ ମାଲକାନଗିରି ଜିଲାରୁ ଗଞ୍ଜେଇ କାର, ଟ୍ରକ ଏବଂ ବସ ଯୋଗେ ପଡୋଶୀ ଜିଲ୍ଲା କଳାହାଣ୍ଡି ଏବଂ ରାଜ୍ୟ ବାହାରକୁ ଚୋରା ଚାଲାଣ ହେଉଛି । ଏହାରି ମଧ୍ୟରେ ନବରଙ୍ଗପୁର ପୋଲିସ ବିଭାଗ ତପ୍ତରତା ଦେଖାଇ କିଛି ମାସ ମଧ୍ୟରେ ଆନୁମାନିକ ଏକ କୋଟିରୁ ଉର୍ଦ୍ଧ୍ବ ଟଙ୍କାର ଗଞ୍ଜେଇ ଜବତ କରିଥିବା ଜଣାପଡ଼ିଛି |
ଗତ ଦୁଇ ଦିନ ତଳେ ସିମିଳିଗୁଡାରୁ କଳାହାଣ୍ଡି ଯାଉଥିବା 2ଟି କାର ଏବଂ ଗୋଟିଏ ଟାଟା ମ୍ୟାଜିକ ଗାଡ଼ିରୁ 152କେଜି ଗଞ୍ଜେଇ ଜବତ କରି ଏଥିରେ ସମ୍ପୃକ୍ତ 6 ଜଣକୁ ପୋଲିସ ଗିରଫ କରିବାରେ ସକ୍ଷମ ହୋଇଥିଲା । ପୁଣି କୌଣସି ସୂତ୍ରରୁ ଖବର ପାଇ ନବରଙ୍ଗପୁର ଏସପି ନିତିନ କୁଲସେକରଙ୍କ ନିର୍ଦ୍ଦେଶରେ ନବରଙ୍ଗପୁର ଥାନା ଅଧିକାରୀ ପ୍ରତ୍ୟୁଷ ମହାପାତ୍ରଙ୍କ ନେତୃତ୍ବରେ ଏକ ଟିମ୍ ଉତ୍ତରପ୍ରଦେଶର ଏକ ଟ୍ରକକୁ ପିଛା କରିଥିଲେ ।
ତେବେ ଟ୍ରକଟିକୁ ନବରଙ୍ଗପୁର ଉମରକୋଟ ରାସ୍ତାରେ ଅଟକାଇ ଥାନାକୁ ଆଣି ସେଠାରେ ଚୋରା କେବିନ ମଧ୍ୟରୁ ଲକ୍ଷାଧିକ ଟଙ୍କାର ଗଞ୍ଜେଇ ଜବତ କରିଛି ନବରଙ୍ଗପୁର ପୋଲିସ । ବର୍ତ୍ତମାନ ସୁଦ୍ଧା ଗଞ୍ଜେଇର ମାପ କରାଯାଇ ନଥିବା ବେଳେ ଏହାର ଆନୁମାନିକ ମୂଲ୍ୟ 25 ଲକ୍ଷରୁ ଉର୍ଦ୍ଧ୍ବ ହେବ ବୋଲି ଅନୁମାନ କରାଯାଉଛି |
ପୋଲିସ ଏଥିରେ ସମ୍ପୃକ୍ତ 2ଜଣ ଉତ୍ତରପ୍ରଦେଶ ବାସିନ୍ଦାଙ୍କୁ ଅଟକ ରଖିଥିବା ବେଳେ ଗଞ୍ଜେଇ ସବୁ ଜୟପୁରରୁ ଉତ୍ତରପ୍ରଦେଶ ଯାଉଥିବା ଜଣାପଡିଛି | ଚଢାଉ ବେଳେ ଅନ୍ୟ ମାନଙ୍କ ମଧ୍ୟରେ ଏସଆଇ ଏସ. ପୂଜାରୀ, ଏଏସଆଇ ଏକେ. ଦେଓ, କୃଷ୍ଣ ବିଶୋଇ ଏବଂ ସାଗର ମାଝୀ ପ୍ରମୁଖ ଉପସ୍ଥିତ ଥିଲେ |
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
