କୋରାପୁଟ: ବିଗତ ଦିନଗୁଡିକରେ ଓଡିଶା ସରକାରଙ୍କ ଅବହେଳା ଯୋଗୁଁ କୋଟିଆର ଅନେକ ଗ୍ରାମ ଆନ୍ଧ୍ରପ୍ରଦେଶ ଅକ୍ତିଆରକୁ ଚାଲିଯାଇଥିବା ନେଇ ଆମ କୋଟିଆ ସଙ୍ଗଠନ ଆବାହକ ତଥା କୋରାପୁଟର ପୂର୍ବତନ ଜିଲ୍ଲାପାଳ ଗଦାଧର ପରିଡା ଅଭିଯୋଗ କରିଛନ୍ତି । ବର୍ତ୍ତମାନ ଆନ୍ଧ୍ରପ୍ରଦେଶର ବିଜୟନଗର ଜିଲ୍ଲାରେ ଥିବା ସମଗ୍ର ପାଚିପେଣ୍ଟା ପଞ୍ଚାଯତ ଜଯପୁର ଜମିଦାରୀରେ ଥିଲା ଓ ସମଗ୍ର ଜଯପୁର ଜମିଦାରୀ ଓଡିଶାରେ ସାମିଲ ହୋଇଥିବା ରେକର୍ଡରେ ଲିପିବଦ୍ଧ ଅଛି ବୋଲି ସେ କହିଛନ୍ତି ।
କିନ୍ତୁ ଆଶ୍ଚର୍ଯ୍ୟର କଥା ଯେ 1952 ପରେ ପାଚିପେଣ୍ଟା ପଞ୍ଚାୟତର ସମସ୍ତ ଗ୍ରାମ ଆନ୍ଧ୍ରପ୍ରଦେଶ ଅକ୍ତିଆରକୁ ଚାଲିଯାଇଛି । ଏହା କିପରି ଚାଲିଗଲା ସେ ସଂକ୍ରାନ୍ତରେ ଓଡିଶାର ରାଜସ୍ୱ ମନ୍ତ୍ରୀଙ୍କୁ ବିଭିନ୍ନ ତଥ୍ୟ ସମ୍ବଳିତ ପତ୍ର ଲେଖିଥିବା ନେଇ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି । ଏହାର ତଦନ୍ତ କରି ପାଚିପେଣ୍ଟା ପଞ୍ଚାୟତକୁ ଓଡିଶାରେ ମିଶାଇବା ପାଇଁ ପ୍ରକ୍ରିୟା ଆରମ୍ଭ କରିବାକୁ ଦାବି ଉପସ୍ଥାପନ କରିଛନ୍ତି । ସେହିପରି ଆଇନଗତ ଲଢେଇରେ ଠିକ ଭାବେ ଓଡିଶାର ଅଧିକାରକୁ ସାବ୍ୟସ୍ତ କରିନପାରିବା ଯୋଗୁଁ ବୋରାମୁଠାର 13 ଟି ଗ୍ରାମ ମଧ୍ୟ ଆନ୍ଧ୍ର କବଜାକୁ ଚାଲିଯାଇଛି ବୋଲି ଗଦାଧର ପରିଡା ଅଭିଯୋଗ କରିଛନ୍ତି ।
ବର୍ତ୍ତମାନ କୋଟିଆର 21 ଟି ଗ୍ରାମ ଉପରେ ଓଡିଶାର ଅଧିକାର ଫେରାଇ ଆଣିବା ପାଇଁ ଉପଯୁକ୍ତ ଭାବେ ପଦକ୍ଷେପ ନନେଲେ ପାଚିପେଣ୍ଟା ଓ ବୋରାମୁଠା ଭଳି କୋଟିଆ ପଞ୍ଚାୟତ ମଧ୍ୟ ସମସ୍ତ ଓଡିଆଙ୍କ ନାକ ତଳେ ଆନ୍ଧ୍ର ହାତକୁ ଖସିଯିବା କିଛି ଅସମ୍ଭବ ନୁହେଁ ବୋଲି ଆଶଙ୍କା ବ୍ୟକ୍ତ କରିଛନ୍ତି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
