ଖୋର୍ଦ୍ଧା: ଅନ୍ଧାର ରାତିରେ ଗାଁର ଏକାଧିକ ଘରେ କଳାକନା ବୁଲାଇଲେ ଚୋର । କାହା ଘରୁ ତାଲା ଭାଙ୍ଗି ଗଡରେଜରୁ ଟଙ୍କା ସୁନା ନେଇଗଲେ ତ ଆଉ କାହା ଘରୁ ଏକାଥରେ ଟ୍ରଙ୍କ ଟେକି ନେଇଗଲେ । ଗତକାଲି(ସୋମବାର) ବିଳମ୍ବିତ ରାତିରେ ଖୋର୍ଦ୍ଧା ଜିଲ୍ଲା ବୋଲଗଡ ଥାନା ବାଙ୍କୋଇ ଫାଣ୍ଡି ଅନ୍ତର୍ଗତ ଅସରଳା ଗ୍ରାମର ତିନି ଜଣଙ୍କ ଘରୁ ଏହି ଚୋରି ହୋଇଛି । ଚୋରମାନେ ଲକ୍ଷାଧିକ ଟଙ୍କାର ସୁନା ଅଳଙ୍କାର ସହ ଟଙ୍କା ଓ କଂସା ବାସନ ଚୋରି କରିନେଇଥିବା ଅଭିଯୋଗ ହୋଇଛି । ଖବର ପାଇ ବାଙ୍କୋଇ ଫାଣ୍ଡି ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି ।
ମିଳିଥିବା ସୂଚନା ଅନୁସାରେ, ଅସରଳା ଗ୍ରାମର ପ୍ରଦୀପ କୁମାର ସାମନ୍ତରାୟଙ୍କ ଘରୁ ଦୁବୃର୍ତ୍ତମାନେ ଘରର ତାଲା ଭାଙ୍ଗି ଗଡ଼ରେଜରୁ ଲକ୍ଷାଧିକ ଟଙ୍କାର ସୁନା ଅଳଙ୍କାର ସହ ନଗଦ ୭୦ ହଜାର ଟଙ୍କା ନେଇ ଯାଇଥିବା ଅଭିଯୋଗ ହୋଇଛି । ସେହିପରି ଜଗନ୍ନାଥ ଜେନାଙ୍କ ବାଡି ପଟ କବାଟ ଭାଙ୍ଗି ତାଙ୍କ ଟ୍ରଙ୍କ ଟେକି ନେଇ ସେଥିରେ ଥିବା ସୁନା ପେଣ୍ଡି, ମାଳ, ପାଉଜି ଓ ଚେନ୍ ସହ ନଗଦ ୨୦ ହଜାର ଟଙ୍କା ନେଇଯାଇଛନ୍ତି । ଏହାପରେ ବାଡିପଟ ବିଲରେ ଟ୍ରଙ୍କକୁ ଫିଙ୍ଗି ଚାଲିଯାଇଛନ୍ତି ଚୋର ।
ଗ୍ରାମର ସନ୍ତୋଷ କୁମାର ଗୁମାନସିଂହଙ୍କ ଘରେ ମଧ୍ୟ କଳାକନା ବୁଲାଇଛନ୍ତି । ସନ୍ତୋଷଙ୍କ ବାଡିପଟ କବାଟ ଭାଙ୍ଗି ତାଙ୍କ ଘରୁ କଂସା ବାସନ ସହ ସୁନା ଚେନ୍, ମୁଦି, ପାଉଞ୍ଜି, ହାର ଏବଂ ନଗଦ ୩୦ ହଜାର ଟଙ୍କା ଚୋରି କରିଥିବା ବାଙ୍କୋଇ ଫାଣ୍ଡିରେ ଅଭିଯୋଗ ହୋଇଛି । ଗତକାଲି ବିଳମ୍ବିତ ରାତିରେ ଏକକାଳୀନ ତିନି ଜଣଙ୍କ ଘରୁ ଏହି ଚୋରି ହୋଇଛି । ଏନେଇ ସମ୍ପୃକ୍ତ ପରିବାରଙ୍କ ପକ୍ଷରୁ ବାଙ୍କୋଇ ଫାଣ୍ଡିରେ ଲିଖିତ ଅଭିଯୋଗ ହେବା ପରେ ଫାଣ୍ଡି ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
କେବଳ ଚୋରି ନୁହେଁ, ବାଙ୍କୋଇ ଫାଣ୍ଡି ଅଞ୍ଚଳରେ ଦିନକୁ ଦିନ ଦେଶୀ ରନ୍ଧା ମଦ ଓ ଧଳାଜହର କାରବାର ବୃଦ୍ଧି ପାଉଛି । କିଛି ଦିନ ତଳେ ଅବକାରୀ ବିଭାଗ ଜଣେ ମଦ ମାଫିଆ ନିକଟରୁ ହଜାର ଲିଟର ପୋଚ ନଷ୍ଟ କରିବା ସହ ମଦ ଜବତ କରିଥିଲା । ହେଲେ ମଦ ମାଫିଆଙ୍କୁ ଗିରଫ କରିବାରେ ବିଫଳ ହୋଇଥିଲା । ବିଭିନ୍ନ ସମୟରେ ସାଇକେଲ ଦୋକାନ ଠାରୁ ଆରମ୍ଭ କରି ପାନ ଦୋକାନ ଓ ପୋଖରୀ କୂଳରେ ମଦ, ଗଞ୍ଜେଇ ଓ ଧଳା ଜହର ବିକ୍ରି ହେଉଥିବା ବେଳେ ପୋଲିସ ଅଭିଯୁକ୍ତଙ୍କୁ ଧରିବାରେ ବିଫଳ ହେଉଛି । ତେବେ ଗତକାଲି ରାତିରେ ହୋଇଥିବା ଏହି ସିରିଜ ଲୁଟ ଘଟଣାରେ ଦୁର୍ବୃତ୍ତମାନଙ୍କୁ ପୋଲିସ ଧରିବାରେ ସଫଳ ହେଉଛି କି ନାହିଁ ତାହା ଦେଖିବା ବାକି ରହିଲା ।
ଇଟିଭି ଭାରତ, ଖୋର୍ଦ୍ଧା
