ଭୁବନେଶ୍ବର: ବିଘ୍ନବିନାଶକଙ୍କ ଆଗମନକୁ ନେଇ ରାଜଧାନୀ ଭୁବନେଶ୍ବରରେ ଚାଲିଛି ଜୋରଦାର ପ୍ରସ୍ତୁତି । ପୂଜା ମଣ୍ଡପଗୁଡ଼ିକ ସଜେଇ ହୋଇଥିବାବେଳେ ଆଉ ମୂର୍ତ୍ତି ପ୍ରସ୍ତୁତିରେ ଲାଗିଛନ୍ତି କାରିଗର । ତେବେ ସହିଦ ନଗର ପୂଜା ମଣ୍ଡପରେ କାରିଗରମାନେ ମୂର୍ତ୍ତି ନିର୍ମାଣରେ ନିମଗ୍ନ ଥିବା ବେଳେ ଏଥର ସହିଦନଗର ୱିନର ଆସୋସିଏସନରେ କାଳିୟ ଦଳନ ବେଶରେ ପୂଜା ପାଇବେ ଗଜାନନ । ୮ ବର୍ଷ ଧରି ଆସୋସିଏସନ ବଡ ମୂର୍ତ୍ତି କରି ଆସୁଥିବାବେଳେ ଏଥର ୪୬ ଫୁଟର କାଳିୟ ଦଳନ ମୂର୍ତ୍ତି ମୁଖ୍ୟ ଆକର୍ଷଣ ସାଜିବ ।
ବିଶେଷ କରି ଗଣେଶଙ୍କ ପାଖରେ ୭୦ କେଜିର ଲଡ଼ୁ ଶୋଭା ପାଇବ । ପ୍ରତିବର୍ଷ ଭଳି ଏଥର ମଧ୍ୟ ଇକୋ ଫ୍ରେଣ୍ଡଲି ଗଣେଶ ପ୍ରସ୍ତୁତ କରାଯିବ । ୧୬ ଲକ୍ଷ ବ୍ୟୟ ଅଟକଳରେ ଚଳିତ ବର୍ଷ ପୂଜା କରାଯାଉଥିବାବେଳେ ୭ ଦିନ ଧରି ସାଂସ୍କୃତିକ କାର୍ଯ୍ୟକ୍ରମ ଚାଲିବ । ଯେଉଁଥିରେ ଓଡ଼ିଶାର ବିଭିନ୍ନ କଳାକାରମାନଙ୍କ ଦ୍ୱାରା ଲୋକନୃତ୍ୟ ମାଧ୍ୟମରେ କଳା, ସଂସ୍କୃତିର ପ୍ରଦର୍ଶନ ହେବ । ଖାଲି ସେତିକି ନୁହେଁ, ଦୃଷ୍ଟିବାଧିତ ଓ ଶ୍ରବଣ ବାଧିତ ଲୋକମାନଙ୍କୁ ଗଣେଶଙ୍କ ଦର୍ଶନ କରାଇବ ଆସୋସିଏସନ । ଶୃଙ୍ଖଳିତ ଓ ସୁରକ୍ଷିତ ଦର୍ଶନକୁ ନେଇ ପୋଲିସର ସହାୟତା ନିଆଯାଇଥିବାବେଳେ ୨୦୦ ସ୍ବେଛାସେବୀ ନିୟୋଜିତ ରହିବେ । ଏହାସହ ସିସିଟିଭି ନଜରରେ ସମ୍ପୂର୍ଣ୍ଣ ପୂଜା ମଣ୍ଡପ ରହିବ ବୋଲି କହିଛନ୍ତି ଆସୋସିଏସନର ସଦସ୍ୟ ।
ଅନ୍ୟପଟେ ଭୁବନେଶ୍ୱର ଉପକଣ୍ଠ ସିଜୁଆ ଗ୍ରାମର 'ଯୁଗ ଜ୍ୟୋତି ଯୁବକ ସଂଘ' ପକ୍ଷରୁ ଚଳିତବର୍ଷ ପୂଜା ମଣ୍ଡପର ମହୀସୁର ପ୍ୟାଲେସରେ ଶୋଭା ପାଇବେ ଅଗ୍ରପୂଜ୍ୟ । ୫୫ ବର୍ଷର ଏହି ପୂଜା ମଣ୍ଡପ ପ୍ରତିବର୍ଷ ନିଆରା ତଥା ଆକର୍ଷଣୀୟ ପୂଜା କରି ଆସୁଥିବାବେଳେ ଚଳିତ ବର୍ଷ ମହୀସୁର ପ୍ୟାଲେସର ପ୍ରସ୍ତୁତି କରୁଛନ୍ତି । ତେବେ ଏଥର ୨୦ ଫୁଟର ଗଣେଶ ମୂର୍ତ୍ତି ପ୍ରସ୍ତୁତ କରାଯାଉଛି ।
ପୂଜା ପାଇଁ ୫୦ ଲକ୍ଷ ବ୍ୟୟ ଅଟକଳ କରାଯାଇଥିବାବେଳେ ୩ ଦିନର ସାଂସ୍କୃତିକ କାର୍ଯ୍ୟକ୍ରମ ସହ ୩ଟି ଯାତ୍ରାର ଆୟୋଜନ କରାଯାଇଛି । ଏଥର ସାଂସ୍କୃତିକ କାର୍ଯ୍ୟକ୍ରମରେ ମୁଖ୍ୟ ଆକର୍ଷଣ ସାଜିବେ ଓଡ଼ିଶାର ଜଣାଶୁଣା କଣ୍ଠଶିଳ୍ପୀ ଇରା ମହାନ୍ତି, ଋତୁରାଜ ମହାନ୍ତି, ସ୍ୱୟଂ ପାଢ଼ୀ ଏବଂ ଅନ୍ତରା ଚକ୍ରବର୍ତ୍ତୀ । ସବୁ ବର୍ଷ ପରି ପ୍ରତିଦିନ ପ୍ରସାଦ ସେବନର ବ୍ୟବସ୍ଥା ରହିଥିବାବେଳେ ପୂଜାର ପ୍ରସ୍ତୁତିକୁ ନେଇ ବେଶ ଖୁସି ଥିବା କହିଛନ୍ତି ଯୁଗ ଜ୍ୟୋତି ଯୁବକ ସଂଘର ସଦସ୍ୟ ।
ଇଟିଭି ଭାରତ, ଭୁବନେଶ୍ବର
