ଖୋର୍ଦ୍ଧା: ଗରିବ ଲୋକଙ୍କ ପାଇଁ ସରକାରଙ୍କ ମାଳମାଳ ଯୋଜନା । ତେବେ ଡାକ୍ତରଖାନାରେ ରୋଗୀର ମୃତ୍ୟୁ ହେବା ପରେ ମୃତଦେହକୁ ମହାପ୍ରୟାଣ ଗାଡିରେ ବିନା ମୂଲ୍ୟରେ ଘରେ ପହଞ୍ଚାଇବାକୁ ସରକାର ଆରମ୍ଭ କରିଥିଲେ ମହାପ୍ରୟାଣ ଯୋଜନା । ହେଲେ ରୋଗୀଙ୍କ ପାଇଁ ଉଦ୍ଦିଷ୍ଟ ଥିବା ମହାପ୍ରୟାଣ ଗାଡି ଖତ ଖାଉଛି ଜିଲ୍ଲା ମୁଖ୍ୟଚିକିତ୍ସାଳୟରେ ।
ଫଳରେ ରୋଗୀଙ୍କ ପରିବାର ଗାଡି ନ ପାଇ ନାନା ଅସୁବିଧାର ସମ୍ମୁଖିନ ହେଉଥିବା ଅଭିଯୋଗ ହୋଇଛି । ମେଡିକାଲରେ ମହାପ୍ରୟାଣ ଗାଡି ତ ଅଛି ହେଲେ ଡ୍ରାଇଭର ନଥିବାରୁ ଏହା କାମରେ ଲାଗି ପାରୁନି । ଯାହା ଫଳରେ ଲୋକେ ଗାଡି କରି ମୃତଦେହକୁ ନେଉଛନ୍ତି । ଯାହାର ଫାଇଦା ଉଠାଉଛନ୍ତି ଘରୋଇ ଆମ୍ବୁଲାନ୍ସ ଗାଡିର ମାଲିକ ମାନେ । ରୋଗୀଙ୍କ ପରିବାର ଠାରୁ ମନଇଚ୍ଛା ଶୋଷଣ କରୁଥିବା ମଧ୍ୟ ଅଭିଯୋଗ ହୋଇଛି । ଏ ପ୍ରସଙ୍ଗରେ ଆମେ ଜିଲ୍ଲା ମୁଖ୍ୟ ଚିକିତ୍ସାଧିକାରୀଙ୍କୁ ପଚାରିଥିଲୁ । ସେ ଡ୍ରାଇଭର ଅଭାବ କଥା କହିବା ସହ ଖୁବ୍ ଶୀଘ୍ର ସମସ୍ୟାର ସମାଧାନ କରାଯିବ ବୋଲି କହିଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
