ଭୁବନେଶ୍ବର: ସୌଦାମିନୀଙ୍କୁ ନ୍ୟାୟ ପାଇଁ ମାନବାଧିକାର କମିଶନଙ୍କ ଦ୍ୱାରସ୍ଥ ହେଲା କଂଗ୍ରେସ । ପାରଳାଖେମୁଣ୍ଡିର ମେଧାବୀ ଆଦିବାସୀ ଛାତ୍ରୀ ସୌଦାମିନୀ ରଇତା ଓ ତାଙ୍କ ପରିବାରକୁ ନ୍ୟାୟ ଦେବାପାଇଁ ଓଡିଶା ମାନବ ଅଧିକାର କମିଶନ (OHRC)ର ଦ୍ୱାରସ୍ଥ ହେଲା କଂଗ୍ରେସ । ଆଜି ସୌଦାମିନୀଙ୍କ ପରିବାର ସହ ଭୁବନେଶ୍ୱର OHRC କାର୍ଯ୍ୟାଳୟରେ କମିଶନଙ୍କୁ ଭେଟିଛନ୍ତି କଂଗ୍ରେସ ନେତା ବିଜୟ ପଟ୍ଟନାୟକ ।
ଗଜପତି ଜିଲ୍ଲା ପାରଳାଖେମୁଣ୍ଡି ସ୍ଥିତ ଜବାହର ନବୋଦୟ ବିଦ୍ୟାଳୟର ନବମ ଶ୍ରେଣୀର ଛାତ୍ରୀ ସୌଦାମିନୀଙ୍କ ସନ୍ଦେହଜନକ ମୃତ୍ୟୁ ଘଟଣା ସାରା ରାଜ୍ୟରେ ଚହଳ ସୃଷ୍ଟି କରିଥିଲା । ସୌଦାମିନୀ ରଇତାଙ୍କ ମୃତ୍ୟୁ ଘଟଣାରେ ନ୍ୟାୟ ଦାବି କରି ତାଙ୍କ ମାଆ ସୁଜ୍ଞାନୀ ଗମାଙ୍ଗୋ ୪୬ ଦିନ ଧରି ଧାରଣାରେ ମଧ୍ୟ ବସିଥିଲେ । ଝିଅ ମୃତ୍ୟୁ ଘଟଣା ଅପମୃତ୍ୟୁ ନୁହେଁ ଏହା ଏକ ଦୁଷ୍କର୍ମ ଓ ହତ୍ୟା ବୋଲି ପରିବାର ପକ୍ଷରୁ ଅଭିଯୋଗ ହୋଇଥିଲା । ଏହାପରେ ଏହି ମାମଲା କ୍ରାଇମବ୍ରାଞ୍ଚକୁ ହସ୍ତାନ୍ତର କରାଯାଇଥିଲା । ତଦନ୍ତକୁ 5 ମାସ ବିତିଗଲା ପରେ ବି ଏହି ଘଟଣାରେ ସଂପୃକ୍ତ ବ୍ୟକ୍ତିଙ୍କ ବିରୁଦ୍ଧରେ କାର୍ଯ୍ୟନୁଷ୍ଠାନ ନେବା ଦୂରର କଥା ଏପର୍ଯ୍ୟନ୍ତ କ୍ରାଇମବ୍ରାଞ୍ଚ ତଦନ୍ତ ରିପୋର୍ଟ ପ୍ରକାଶ ପାଇନାହିଁ ।
ତେଣୁ ଆଜି କଂଗ୍ରେସ ପ୍ରଚାର କମିଟି ଅଧ୍ୟକ୍ଷ ବିଜୟ ପଟ୍ଟନାୟକ ସୌଦାମିନୀ ଓ ତାଙ୍କ ପରିବାରଙ୍କୁ ନ୍ୟାୟ ଦେବା ପାଇଁ ରାଜ୍ୟ ମାନବ ଅଧିକାର କମିଶନରଙ୍କ ନିକଟରେ ଦ୍ୱାରସ୍ଥ ହୋଇଛନ୍ତି । OHRC ସଦସ୍ୟ ଅସୀମ ଅମିତାଭ ଦାସଙ୍କୁ ଭେଟି ଏହି ଘଟଣା ବିଷୟରେ ଆଲୋଚନା କରିଛନ୍ତି ବିଜୟ । ସେ କହିଛନ୍ତି, "ଆଦିବାସୀ ଝିଅକୁ ନ୍ୟାୟ ଦେବାକୁ ଏକ ନିର୍ଣ୍ଣାୟକ ଲଢେଇ ଲଢ଼ିବ କଂଗ୍ରେସ । ନିକଟରେ ଗଜପତି ଜିଲ୍ଲା ଗସ୍ତ ସମୟରେ ଏହି ମେଧାବୀ ଆଦିବାସୀ ଛାତ୍ରୀଙ୍କ ସନ୍ଦେହଜନକ ମୃତ୍ୟୁ ଘଟଣାର ଖବର ସାମ୍ନାକୁ ଆସିଥିଲା । ପୀଡିତାଙ୍କ ମା' ବିଭିନ୍ନ ସ୍ଥାନରେ ନ୍ୟାୟ ପାଇଁ ଦାବି କରୁଥିଲେ ମଧ୍ୟ ଆଜି ପର୍ଯ୍ୟନ୍ତ ତାଙ୍କୁ ନ୍ୟାୟ ମିଳିପାରିନାହିଁ ।"
ଏହା ବି ପଢନ୍ତୁ...ରାଉରକେଲା ଆସିଷ୍ଟାଣ୍ଟ କଲେକ୍ଟର ଓ ASI ମୃତ୍ୟୁ ଘଟଣା: ନ୍ୟାୟ ଦାବିରେ ଏକାଠି ହେଲେ ଶହ ଶହ ଆଦିବାସୀ
ବିଜୟ ଆହୁରି ମଧ୍ୟ କହିଛନ୍ତି, "ଦାୟିତ୍ୱରେ ଥିଲେ ଶିକ୍ଷକ ଓ ୱାଡେନଙ୍କ ବିରୁଦ୍ଧରେ ଏପର୍ଯ୍ୟନ୍ତ କ'ଣ ତଦନ୍ତ ହୋଇଛି ଓ କାର୍ଯ୍ୟାନୁଷ୍ଠାନ ନିଆଯାଇଛି ? ପୋଷ୍ଟମଟମ୍ ରିପୋର୍ଟ ସହ ଭିଡିଓଗ୍ରାଫିର ସମାନତା ନାହିଁ। ସଠିକ ତଦନ୍ତ ହୋଇନଥିବାରୁ ହତ୍ୟା ଓ ଦୁଷ୍କର୍ମ ଭଳି ଘଟଣାକୁ ଆତ୍ମହତ୍ୟାର ରୂପ ଦିଆଯାଇଥିବାର ସନ୍ଦେହ ହେଉଛି । ସାରା ରାଜ୍ୟରୁ 5T ସଚିବ ବୁଲିବୁଲି ଅଭିଯୋଗ ଶୁଣିଥିବାବେଳେ ଗଜପତି ଜିଲ୍ଲା ଗସ୍ତ ସମୟରେ ପୀଡ଼ିତାଙ୍କ ମାଆ ସଠିକ ତଦନ୍ତ କରି ନ୍ୟାୟ ପାଇଁ 5T ସଚିବଙ୍କ ନିକଟରେ ଦାବି କରିଥିଲେ ମଧ୍ୟ ସେଥିପ୍ରତି ଧ୍ୟାନ ଦିଆଯାଇନଥିଲା । ରାଜ୍ୟରେ ମହିଳାଙ୍କ କ୍ଷେତ୍ରର ଅପରାଧ ବଢ଼ିଚାଲିଛି । ସରକାର ମହିଳାଙ୍କୁ ସୁରକ୍ଷା ଓ ନ୍ୟାୟ ଦେବାରେ ବିଫଳ । ପୂର୍ବରୁ ଇତିଶ୍ରୀ, କୁନ୍ଦୁଲି, ମମତାଙ୍କ ଭଳି ଅନେକ ଘଟଣାରେ ପୀଡିତାଙ୍କୁ ସୁରକ୍ଷା ଓ ନ୍ୟାୟ ମିଳିପାରିନଥିବାବେଳେ ପାରଳାଖେମୁଣ୍ଡିର ମେଧାବୀ ଆଦିବାସୀ ଛାତ୍ରୀଙ୍କ କ୍ଷେତ୍ରରେ ମଧ୍ୟ ସମାନ ସ୍ଥିତି ଦେଖା ଦେଇଛି ।"
ଇଟିଭି ଭାରତ, ଭୁବନେଶ୍ବର
