କେନ୍ଦୁଝର: ପୁଅର ଚିକିତ୍ସା ପାଇଁ ଜିଲ୍ଲାପାଳଙ୍କ ଦ୍ବାରସ୍ଥ ହୋଇଛନ୍ତି ଘଟଗାଁ ବ୍ଲକ ଉପରଡିହା ଗ୍ରାମର ଧନେଶ୍ବର ବେହେରା । 24 ବର୍ଷର ପୁଅ ରାଜେଶ ବେହେରାଙ୍କ ଚିକିତ୍ସା ପାଇଁ ସେ ଜିଲ୍ଲାପାଳଙ୍କ ଆଗରେ ଗୁହାରି କରିଛନ୍ତି । ଜିଲ୍ଲାପାଳ କିଛି ସହାୟତା ନକଲେ ସେ ବାଧ୍ୟ ହୋଇ ହାଇକୋର୍ଟରେ ପୁଅର ଇଚ୍ଛା ମୃତ୍ୟୁ ପାଇଁ ଆବେଦନ କରିବେ ବୋଲି କୋହଭରା କଣ୍ଠରେ କହିଛନ୍ତି ।
ସୂଚନା ଅନୁସାରେ, ଦୁରାରୋଗ୍ୟ ୱଇଲସନ ରୋଗରେ ପୀଡିତ ଥିବା ରାଜେଶଙ୍କ ଚିକିତ୍ସା ପାଇଁ ଧନେଶ୍ବର ସମସ୍ତ ପୁଞ୍ଜି ଖର୍ଚ୍ଚ କରିସାରିଛନ୍ତି । ଧନେଶ୍ବର ଜଣେ ଗଣ ଶିକ୍ଷକ ହୋଇଥିବାବେଳେ ପୁଅର ଚିକିତ୍ସା ପାଇଁ ସବୁ ଅର୍ଥ ଖର୍ଚ୍ଚ କରି ସାରିଲେଣି । ନିଜେ ଆଉ ଚିକିତ୍ସା କରିନପାରି ଗତ ଅଗଷ୍ଟ ମାସରେ ଜିଲ୍ଲାପାଳଙ୍କ ଜରିଆରେ ରାଷ୍ଟ୍ରପତିଙ୍କୁ ପୁଅର ଇଚ୍ଛାମୃତ୍ୟୁ ପାଇଁ ଆବେଦନ କରିଥିଲେ ।
ଏହାପରେ ଇଟିଭି ଭାରତରେ ଖବର ପ୍ରକାଶିତ ହେବାପରେ ପ୍ରଶାସନ ତତ୍ପର ହୋଇଥିଲା । ଧନେଶ୍ବରଙ୍କୁ ପ୍ରଶାସନ ପକ୍ଷରୁ ଗୋଟେ ମାସର ଚିକିତ୍ସା ପ୍ରଦାନ କରାଯାଇଥିଲା । ବର୍ତ୍ତମାନ ପ୍ରଶାସନ ଆଉ ଟଙ୍କା ନଦେବା ଫଳରେ ରାଜେଶର ଚିକିତ୍ସାରେ ବାଧକ ହୋଇଛି ।
ଫଳରେ ଏନେଇ ସେ ଜିଲ୍ଲାପାଳଙ୍କ ଅଭିଯୋଗ ଶୁଣାଣିରେ ସ୍ତ୍ରୀ ଓ ପୁଅକୁ ଆଣି ପହଞ୍ଚିଛନ୍ତି । ପୁନର୍ବାର ପୁଅର ଚିକିତ୍ସା ଖର୍ଚ୍ଚ ପ୍ରଶାସନ ନଦେଲେ ପୁଅର ଇଚ୍ଛା ମୃତ୍ୟୁ ପାଇଁ ହାଇକୋର୍ଟର ଦ୍ବାରସ୍ଥ ହେବେ ବୋଲି ଧନେଶ୍ବର ପ୍ରକାଶ କରିଛନ୍ତି । ଏନେଇ ପ୍ରଶାସନର ପ୍ରତିକ୍ରିୟା ମିଳିପାରିନଥିବା ବେଳେ ରେଡକ୍ରସ ପକ୍ଷରୁ ସାହାଯ୍ୟ ମିଳିଥିବା ନେଇ ସୂଚନା ମିଳିଛି।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ