ଜଗତସିଂହପୁର: 9ଦଫା ଦାବିକୁ ନେଇ ବ୍ଲକ ଘେରାଉ ସହିତ ବିକ୍ଷୋଭ ପ୍ରଦର୍ଶନ କଲା କଂଗ୍ରେସ । ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ବିରୁଦ୍ଧରେ ଗର୍ଜନ କରି ରାଜ୍ୟର 314ଟି ବ୍ଲକ୍ ଘେରାଉ କରିବା ସହ ସରକାରଙ୍କ ବିରୋଧରେ ନାରା ଦେଇଥିବା ଦେଖିବାକୁ ମିଳିଛି । ଏହି ବିକ୍ଷୋଭରେ ଜିଲ୍ଲା କଂଗ୍ରେସ ସଭାପତି ନଟବର ବାରିକ ଯୋଗ ଦେଇ ସିଧାସଳଖ ଶାସକ ବିଜେଡି ଓ ବିଜେପିକୁ ସମାଲୋଚନା କରିଥିଲେ । ରାଜ୍ୟରେ ବିଜେଡି ସରକାର ଓ କେନ୍ଦ୍ରରେ ବିଜେପି ସରକାର ଗାଁର ବିକାଶ କ୍ଷେତ୍ରରେ ବିଫଳ ହୋଇଥିବା ଅଭିଯୋଗ କରିଛି କଂଗ୍ରେସ ।
ଜିଲ୍ଲା କଂଗ୍ରେସ ସଭାପତି ସଭାପତି ନଟବର ବାରିକ କହିଛନ୍ତି, "ପଞ୍ଚାୟତଠାରୁ ବ୍ଲକ ଅଫିସ ପର୍ଯ୍ୟନ୍ତ ଦୁର୍ନୀତିରେ ବୁଡ଼ି ଗଲାଣି । ସବୁଠାରୁ ୧୫%ରୁ ୫୦% ପ୍ରତିଶତ ପିସି ଆଦାୟ କରାଯାଉଛି । ଉଭୟ ସରକାର ଶହଶହ କୋଟି ଟଙ୍କାର ବିଜ୍ଞାପନ ଦେଇ ଗାଁ ଗଣ୍ଡା ବିକାଶର ମିଛ ଡିଣ୍ଡିମ ପିଟୁଛନ୍ତି । ବାସ୍ତବରେ ସବୁ ଯୋଜନାରୁ ବଞ୍ଚିତ ରହୁଛି ଗରିବ । ଚାଷୀ ତା ଅମଳର ମୂଲ ପାଉନି । ଯୁବକର ହାତକୁ କାମ ନାହିଁ । ରାଜ୍ୟ ବାହାରକୁ ଯାଇ ଦାଦନ ଖଟିବାକୁ ବାଧ୍ୟ ହେଉଛି ଯୁବପିଢି । କଂଗ୍ରେସ ସରକାର ସମୟରେ ଇନ୍ଦିରା ଆବାସ ଯୋଜନା, ପ୍ରଧାନମନ୍ତ୍ରୀ ରୋଜଗାର ଯୋଜନା, ଜାତୀୟ ଖାଦ୍ୟ ସୁରକ୍ଷା ଯୋଜନାର ନାମ ବଦଳାଇ ବିଜେପି ସରକାର ବାହାଦୁରୀ ନେବାରେ ଲାଗିଛନ୍ତି । ହେଲେ ନା କେନ୍ଦ୍ର ନା ରାଜ୍ୟ କିଛି ଯୋଜନାକୁ ସଫଳ କରିପାରୁଛନ୍ତି ।"
ସେ ଅହୁରି ମଧ୍ୟ କହିଛନ୍ତି,"ରାଜ୍ୟରେ ଶିକ୍ଷାର ମେରୁଦଣ୍ଡ ଭାଙ୍ଗି ପଡ଼ିଛି । ସ୍କୁଲ୍ରେ ଶିକ୍ଷକ ନାହାନ୍ତି କି ଡାକ୍ତରଖାନାରେ ଡାକ୍ତର ନାହାଁନ୍ତି । ଚାଷୀର ଚାଷ ଉଜୁଡ଼ି ଗଲେ ମଧ୍ୟ ତାକୁ କ୍ଷତି ପୂରଣ ପ୍ରଦାନ କରାଯାଉ ନାହିଁ । କଂଗ୍ରେସ ସରକାର ସମୟରେ 1995 ମସିହାରେ ବିଜୁଳି ବ୍ୟବସ୍ଥା ସୁଧାରିବା ପାଇଁ ବିଜୁଳି ସଂସ୍କାର ଓଡ଼ିଶାରେ ଲାଗୁହେଲା । ବିଜୁଳି କାଟ ବନ୍ଦ ହେଲା । କିନ୍ତୁ ଏବେ ବିଜୁଳି କ୍ଷେତ୍ରରେ ଓଡ଼ିଶା ବଳକା ରାଜ୍ୟ ହୋଇଥିବା ବେଳେ ଓଡ଼ିଶାରେ ବିଜୁଳି ବିଭ୍ରାଟ ଚରମ ସୀମାରେ ପହଁଞ୍ଚିଛି । ନାରୀ ନିର୍ଯାତନା ଚରମ ସୀମାରେ ପହଞ୍ଚିଛି । ବିଜେଡିର 24 ବର୍ଷର ଶାସନ କାଳ ଓ ବିଜେପିର 8ବର୍ଷର ଶାସନରେ ତାଙ୍କର ମନ୍ତ୍ରୀମଣ୍ଡଳ ଦୁର୍ନୀତି ଛଡ଼ା କିଛି ବି ଜନକଲ୍ୟାଣକାରୀ କାର୍ଯ୍ୟ କରିନାହାନ୍ତି । ତେଣୁ ସରକାର ଏହି 9ଟି ଦାବିକୁ ଯଥାସମ୍ଭବ ପୂରଣ କରନ୍ତୁ ।"
ଇଟିଭି ଭାରତ, ଜଗତସିଂହପୁର
